Isroil mudofaa kuchlari Livan janubidagi “Hizbulloh” harakatining harbiy majmuasini nazoratga oldi, deb xabar qildi armiya matbuot xizmati.
“Isroil armiyasining elita brigadasi bo‘lmish Golani Marun ar-Rasdagi “Hizbulloh” jangovar majmuasini operativ nazoratga oldi, bu Isroil shimolidagi aholiga bevosita tahdid solgan”, deyiladi xabarda.
Matbuot xizmatining qo‘shimcha qilishicha, jangovar majmua turar joy binosidan iborat bo‘lib, uning yonida Isroilning shimoliy aholi punktlarini mo‘ljalga olgan raketalar o‘rnatilgan zaytun bog‘i joylashgan.
Isroil qo‘shinlari binodan qurol-yarog‘, kamuflyaj to‘rlari, harbiy jiletlar, tankka qarshi raketalar, shuningdek, oshxonada yashiringan raketalarni musodara qilgan. Harbiylar, shuningdek, “Hizbulloh” jangchilari yashiringan yerosti infratuzilmasini ham aniqlagan.
Isroil Livan janubida “Hizbulloh” kuchlariga qarshi 1-oktyabrdan beri quruqlikdagi operatsiyani olib bormoqda. Ma’lumotlarga ko‘ra, hujumlar oqibatida mingdan ortiq odam, jumladan, shia harakati yetakchilari halok bo‘lgan, 346 mingdan ortiq kishi uyini tashlab ketishga majbur bo‘lgan.
Isroildagi harbiy kampaniyaning asosiy maqsadi bir yil avval “Hizbulloh” tomonidan Falastinning HAMAS harakatini qo‘llab-quvvatlash uchun boshlagan o‘qqa tutilishi sababli evakuatsiya qilingan shimolning 60 ming aholisini vatanga qaytarish uchun sharoit yaratishdan iborat.
Izoh (0)