Qirg‘iziston terma jamoasi Rossiyaga qarshi o‘rtoqlik o‘yini o‘tkaza olmaydi.
“Terma jamoamiz Osiyo mintaqasi saralashida ishtirok etmoqda. Bu esa iyungacha bo‘lgan FIFA kunlarining barchasi band degani.
10-oktyabr kuni Qatarga qarshi o‘ynaymiz, 15-oktyabrda esa Shimoliy Koreyani qabul qilamiz. 14-noyabrda BAA mehmoni bo‘lamiz, 18-da esa Eronga qarshi maydonga tushamiz.
RFI o‘rtoqlik o‘yini bo‘yicha taklif bilan chiqqani yo‘q. Bishkekda o‘yin o‘tkazgan vaqtimizda ehtimoliy o‘yinni muhokama qilgandik, lekin ular bizning taqvimimiz rasmiy o‘yinlar bilan band bo‘lganini bilsa kerak”, — deydi Qirg‘iziston futbol uyushmasi bosh kotibi Nurdin Bukuyev.
Shuningdek, Bukuyev o‘rtoqlik o‘yinlari o‘tkazish borasida ham o‘z fikrlarini bildirib o‘tdi.
“Kuchli raqiblar bilan o‘ynash har doim qiziq bo‘lgan. Rossiyaga qarshi o‘yin esa juda ham qiziq. 2025-yilda o‘ynashimiz mumkinmi? Barchasi saralashdagi natijalarga bog‘liq, bu muzokaralarga o‘z ta’sirini o‘tkazadi. Doimo kuchli raqiblar bizni qiziqtirib kelgan. Hozirda Rossiyaga qarshi o‘yin muhokama qilinmayapti”, — deydi bosh kotib.
Avvalroq Tojikiston terma jamoasi ham Rossiyaga qarshi o‘rtoqlik o‘yini o‘tkazish rejasi yo‘qligini ma’lum qilgandi.
Eslatib o‘tamiz, Qirg‘iziston terma jamoasi JCH—2026 saralash bosqichida O‘zbekiston bilan bir guruhdan joy olgan va 2 turdan so‘ng birorta ham ochko jamg‘armagan holda so‘nggi o‘rinda bormoqda.
Izoh (0)