O‘zbekiston va Tojikiston savdo-logistika markazi qurilishi boshlandi

O‘zbekiston va Tojikiston chegarasida “Andarxon” savdo-logistika markazi qurilishi boshlandi. Bu haqda “Xovar” xabar bermoqda.

13-mart kuni markaz qurilishining ochilish marosimi bo‘lib o‘tdi. Unda Farg‘ona viloyati hokimi Xayrullo Bozorov, Tojikiston elchisi Abdujabbor Rahmonzoda, Tojikistonning So‘g‘d viloyati delegatsiyasi va viloyatlar tadbirkorlari ishtirok etdi.

Farg‘ona viloyati hokimligiga ko‘ra, “Andarxon” savdo-logistika markazi 5 gektar maydonda quriladi. Loyiha qurilishiga 7,8 million dollar miqdorida mahalliy investitsiya kiritilishi rejalashtirilgan.

Ma’lumotlarga ko‘ra, majmuada 200 ta savdo rastasi, bank, oshxona, kafe, mehmonxona va logistika markazi o‘rin oladi. 

Markaz ishga tushirilishi bilan unda ikki davlat korxonalarida ishlab chiqarilayotgan mahsulotlar joylashtiriladi. Bu joyda xizmat ko‘rsatish sohasida ming nafar aholi bandligini ta’minlash rejalashtirilmoqda.

Avvalroq O‘zbekiston 2022-yilda qaysi Markaziy Osiyo davlatlari bilan eng ko‘p savdo qilgani ma’lum bo‘lgani haqida xabar berilgandi.