Qashqadaryo viloyati G‘uzor tumanida logistika markazi auksionda sotilmasligi uchun bir kunda 1,4 milliard so‘m kredit qarzdorligini to‘lab berildi. Bu haqda MIB axborot xizmati “Daryo”ga maʼlum qildi.
Xabarga ko‘ra, Chiroqchi tuman iqtisodiy sudining 2022-yil 25-apreldagi ijro varaqasiga asosan qarzdor masʼuliyati cheklangan jamiyat va qo‘shimcha javobgar “B.M.” fermer xo‘jaligi hisobidan 1 milliard 666 million so‘mlik muddati o‘tgan kredit qarzdorligini undirish belgilangan.
Shuningdek, undiruvni G‘uzor tumanida joylashgan “Logistika markazi”ga qaratish belgilangan. Ushbu ijro varaqa yuzasidan Byuroning G‘uzor tuman bo‘limi tomonidan ijro ishi yuritishni qo‘zg‘atish to‘g‘risida qaror qabul qilinib, taraflarga maʼlum qilingan. Ammo qarzdor Byuro xodimlarining ogohlantirishlariga qaramasdan qarzdorlikni bartaraf etishmagan.
Shundan so‘ng, bo‘lim davlat ijrochisi ijro hujjating ijrosini taʼminlash maqsadida xatlangan Logistika markazini elektron onlayn-auksionlarni tashkil etish markazi orqali “E-ijro auksion” yagona elektron savdo maydonchasida sotish yuzasidan qaror qabul qilgan.
Ushbu mulk auksion savdolarida sotilib ketmasligi uchun qarzdor bir kunda 1 milliard 400 million so‘m qarzdorligini to‘lab berdi.
Avvalroq Toshkent shahar, Yakkasaroy tumani, Nukus va Bobur ko‘chalari kesishuvidagi biznes-markaz kimoshdi savdosida 42 milliard so‘mga sotilgani haqida xabar berilgandi. Bino fuqarolik ishlari bo‘yicha sud hukmi bilan Yakkasaroy tuman MIB bo‘limi tomonidan auksionga qo‘yilgan edi.
Izoh (0)