J-United Group kompaniyasi Namangan tumanidagi logistika markazini kengaytirishga 21,8 milliard so‘m (salkam 2 million dollar) investitsiya kiritishni rejalashtirmoqda. Bu haqda O‘zbekistonning 2021—2023-yillarga mo‘ljallangan investitsiya dasturiga tayanib, “Gazeta.uz” xabar berdi.
Korxona va tashkilotlarning yagona davlat registriga ko‘ra, 2002-yilning avgustida ro‘yxatdan o‘tkazilgan J-United Group’ning yagona ta’sischisi Toshkent hokimi Jahongir Ortiqxo‘jayev hisoblanadi.
Kompaniya rahbari sifatida Abdurahim Aminov ko‘rsatilgan. Iqtisodiy faoliyat klassifikatori kodi sifatida — dam olish va istirohat bog‘lari faoliyati ko‘rsatilgan.
Korxona va tashkilotlarning yagona davlat registridagi ochiq ma’lumotlariga ko‘ra, Jahongir Ortiqxo‘jayev, shuningdek, Dream Production kompaniyasi (100 foiz, boshqa joylarda tasniflanmagan texnikalar, uskunalar va moddiy boyliklarni ijaraga va lizingga berish), Vedanta Production ( 100 foiz, noturar joylar ijarasi va ularni boshqarish), Ekzotella (100 foiz, noturar joylar ijarasi va ularni boshqarish), Sky Wind Systems (100 foiz, maishiy elektronika buyumlarini ishlab chiqarish), Techno Profil (100 foiz, noturar joylar ijarasi va ularni boshqarish) va “O‘zgazloyiha” (34,47 foiz) ta’sischisi hisoblanadi. Ularning barchasi 1991—2014-yillar oralig‘ida ta’sis etilgan, Jahongir Ortiqxo‘jayev esa 2018-yilning aprelidan buyon poytaxt hokimi hisoblanadi.
2020-yilning yanvarida esa hokim Britaniyaning Open Democracy nashri surishtiruviga izoh bergan. Maqolada Tashkent City loyihasini amalda oshirishda Jahongir Ortiqxo‘jayevga bog‘liq kompaniyalar shug‘ullanayotgani yozilgandi.
“Prezident meni shahar hokimi etib tayinlaganida, kompaniya boshqaruvini boshqa shaxslarga o‘tkazishim talab qilingan, lekin kompaniyadagi ulushimdan voz kechishim haqida aytilmagan”, — degandi hokim.
Davlat xizmatchilariga ulushlarga egalik qilish taqiqlanmagan
Adliya vazirligi davlat hokimiyati organlarida ishlaydigan insonlar MChJ, AJ, QK maqomiga ega kompaniyalarda ulushga ega bo‘la olish yoki olmasligi to‘g‘risidagi so‘rovga javob bergan.
Vazirlikning ta’kidlashicha, Vazirlar Mahkamasining 1992-yil 6-martdagi 103-sonli “Tadbirkorlik faoliyati bilan shug‘ullanish taqiqlangan mansabdor shaxslarning ro‘yxati to‘g‘risida”gi qaroriga ko‘ra, davlat hokimiyati va boshqaruv organlarining xizmatchilariga tadbirkorlik faoliyati bilan shug‘ullanish taqiqlangan.
“Tadbirkorlik faoliyati erkinligining kafolatlari to‘g‘risida”gi qonunning 3-moddasiga ko‘ra, tadbirkorlik faoliyati (tadbirkorlik) tadbirkorlik faoliyati subyektlari tomonidan qonun hujjatlariga muvofiq amalga oshiriladigan, o‘zi tavakkal qilib va o‘z mulkiy javobgarligi ostida daromad (foyda) olishga qaratilgan tashabbuskorlik faoliyati hisoblanadi.
Mazkur qonunning 4-moddasiga ko‘ra, tadbirkorlik faoliyati subyektlari (tadbirkorlik subyektlari) belgilangan tartibda davlat ro‘yxatidan o‘tgan hamda tadbirkorlik faoliyatini amalga oshirayotgan yuridik va jismoniy shaxslar hisoblanishi qayd etilgan.
Shu bilan birga, jismoniy shaxslarning tijoriy tashkilotlar ustav fondida ulush (aksiyalar)ga egalik qilish tadbirkorlik subyekti sifatida davlat ro‘yxatidan o‘tishni talab qilmaydi.
Ulush (aksiya)ga egalik qilish yuqoridagi qonun hujjatlari orqali belgilab berilgan “tadbirkorlik faoliyati” tushunchasiga mos kelmaydi.
Shundan kelib chiqib, Adliya vazirligining ta’kidlashicha, amaldagi qonunchilikka ko‘ra, tijorat tashkilotlarining ulushlari (aksiyalari)ga egalik qilish bilan bir vaqtning o‘zida davlat organlarida lavozim egallashi to‘g‘ridan to‘g‘ri taqiqlanmagan.
Izoh (0)