Ukraina qurolli kuchlari Nikolayev viloyatidagi Snigiryovka shahrini ozod qilganga o‘xshaydi. Ukraina ommaviy axborot vositalari va Telegram-kanallarida tarqalgan videoda ukrainalik askar boshqa safdoshlari va mahalliy aholi davrasida turgancha shahar 10-noyabr kuni ozod qilinganini aytadi. Tasvirlarga qaraganda, video Snigiryovkaning g‘arbiy qismidan olingan. Ukraina Qurolli kuchlari Bosh shtabi ukrainalik harbiylar shaharni egallab olganini hali tasdiqlamadi.
9-noyabr kuni ijtimoiy tarmoqlarda Snigiryovka g‘arbida o‘rnatilgani aytilayotgan Ukraina bayrog‘ining surati paydo bo‘lgandi. Surat aynan qayerda va qachon olingani noma’lum. Rossiya tomonidan tayinlangan Snigiryovka “ma’muriyati” rahbari Yuriy Barbashov o‘sha kuni kechqurun “RIA Novosti”ga Ukraina qo‘shinlari shaharga hujumda muvaffaqiyat qozonmaganini aytgan.
Snigiryovka mart oyidan beri Rossiya armiyasi nazoratida. Ukraina hududlarining Rossiyaga qo‘shilishi bo‘yicha “referendum” oldidan u Xerson viloyatiga kiritilgan, shundan so‘ng Rossiya hukumati boshqa bosib olingan hududlar kabi bu shaharni ham anneksiya qilgan.
Snigiryovka — muhim logistika markazi, chunki Dneprning o‘ng qirg‘og‘idagi Rossiya qo‘shinlarining jangga tayyorgarlik maydoniga olib boradigan barcha yo‘llar shu yerda birlashadi. U orqali Krivoy Rogdan Nikolayevga va Xersondan shimolga temiryo‘l o‘tadi. Rossiya qo‘shinlari Snigiryovkani Nikolayev tomonga siljish uchun ushlab turgandi.
9-noyabr kuni Rossiya qo‘mondonligi Dneprning o‘ng qirg‘og‘idan qo‘shinlarni olib chiqishini e’lon qildi. O‘sha paytda Meduza hisob-kitoblariga ko‘ra, Rossiya Nikolay viloyati hududining taxminan 4 foizini nazorat qilayotgan edi. Dneprning o‘ng sohilidan to‘liq chiqib ketgan taqdirda, Rossiya Qurolli Kuchlari o‘z nazorati ostidagi Nikolayev viloyati hududini to‘liq yo‘qotadi.
Izoh (0)