NATOning yangi bosh kotibi Mark Ryutte alyans Rossiya yadroviy doktrinasidagi o‘zgarishlardan xavf ko‘rmasligini aytdi. U Moskvani “mas'uliyatsiz yadroviy ritorika‘da aybladi. Xuddi shunday fikrni yaqinda Alyansning sobiq bosh kotibi Yens Stoltenberg ham bildirgan edi.
“Biz Kremldan tahdidlarni eshitdik. Ammo, shu bilan birga, biz yadro qurolidan foydalanish tahdidini ko‘rmayapmiz”, dedi Ryutte bosh kotib sifatidagi birinchi matbuot anjumanida. U bugun Yens Stoltenbergni bu lavozimda almashtirib, bosh kotib sifatidagi faoliyatini boshladi.
Yens Stoltenberg bir kun avval, 30-sentyabr kuni Rossiya yadroviy doktrinasidagi o‘zgarishlar G‘arbning Ukrainaga yordam ko‘rsatishiga to‘sqinlik qilishga urinish ekanini aytgandi. Uning qo‘shimcha qilishicha, hozircha alyansdan hech qanday javob kerak emas.
25-sentyabr kuni Rossiya prezidenti Vladimir Putin yadroviy doktrinaga kiritiladigan o‘zgarishlarni e’lon qildi. Hujjatga ko‘ra, yadro qurolidan foydalanishga dronlar, raketalar yoki harbiy samolyotlarning ommaviy ravishda uchirilishi haqidagi ma’lumotlar asos bo‘lishi mumkin.
Yangilangan doktrinada, shuningdek, yadroviy davlat ko'magida yadroga ega bo‘lmagan davlat tomonidan Rossiyaga qarshi tajovuz qo‘shma hujum sifatida qaralishi aytiladi. 29-sentyabr kuni Kreml yadroviy doktrinaga kiritiladigan o‘zgarishlar allaqachon tayyorlangani va tez orada rasmiylashtirilishini e’lon qildi.
Izoh (0)