Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO) YXHTning O‘zbekistondagi loyihalari koordinatori bilan hamkorlikda va IT Park va CGIAR Accelerate for Impact Platform ko‘magida, Hack4DigitalVillages innovatsion xakatonida ishtirok etish uchun arizalar qabuli boshlanganini eʼlon qiladi.
Tadbirdan maqsad Farg‘ona vodiysi yoshlarining intellektual va ijodiy qobiliyatlarini safarbar qilish va O‘zbekiston Farg‘ona vodiysidagi BMT FAO ning sinov tariqasidagi raqamli qishloqlar aholisiga foyda keltiradigan raqamli innovatsiyalarga eʼtibor qaratishdan iborat.
Xakaton yosh dasturchilar, qishloq xo‘jaligi mutaxassislari va texnologiya ixlosmandlari uchun noyob muammolarni hal qilish va mahalliy fermerlarning qishloq xo‘jaligi amaliyotini takomillashtirishga qaratilgan raqamli yechimlarni birgalikda yaratish va ishlab chiqish uchun platformani taqdim etadi. Tadbir 24—26-noyabr kunlari Toshkent axborot texnologiyalari universitetining Farg‘ona filialida bo‘lib o‘tadi. Uch kun davomida ishtirokchilar fermerlar bilan uchrashish, tajriba almashish va ular bilan bevosita ishlash imkoniyatiga ega bo‘ladilar.
Xakaton davomida ishtirokchilar BMT FAO, YXHT, CGIAR, USAID, IT Park, universitetlar va boshqa tashkilotlar ekspertlaridan yordam va maslahatlar oladilar, shuningdek, o‘z yechim va taqdimotlarini takomillashtirish bo‘yicha bir qator mashg‘ulotlarda qatnashadilar.
Hack4DigitalVillages farg‘onalik yoshlarni Farg‘ona vodiysining qishloq aholisiga taʼsir ko‘rsayotgan quyidagi dolzarb muammolarni hal qilish uchun texnologiyalardan foydalangan holda istiqbolli va innovatsion yechimlarni taqdim etishga taklif qiladi:
- Issiqxonalarni boshqarish;
- Suvdan samarali foydalanish va sug‘orish;
- Pestitsidlarni boshqarish va nazorat qilish;
- Agrobiznesni rivojlantirish uchun taʼlim;
Tanlov komissiyasi barcha arizalarni ko‘rib chiqqan holda, yuqorida sanab o‘tilgan muammolarini hal qilish uchun Buyumlar interneti (IoT) va sunʼiy intellekt (SI) imkoniyatlarini tadqiq qilishga qaratilgan takliflarga alohida eʼtibor qaratadi. Ishtirok etish uchun 25 ga yaqin jamoalar tanlab olinadi.
Kimlar ariza topshirishi mumkin? 16 yoshdan oshgan individual arizachilar va ikki yoki uch ishtirokchidan iborat jamoalar. Ro‘yxatdan o‘tish paytida jamoaga ega bo‘lmagan ishtirokchilar xakatonning birinchi kunida o‘z sheriklarini topishlari mumkin. Farg‘ona vodiysidagi universitet talabalari, qishloq xo‘jaligi muammolari yechimlarini ishlab chiqishga qiziqqan IT-mutaxassislari, qishloq xo‘jaligi sohasidagi mutaxassislar, marketing bo‘yicha mutaxassislar, mahsulot egalari va Farg‘ona vodiysi yoki uning atrofida yashovchi fermerlar ariza topshirishlari mumkin.
Ishtirokchilarning xilma-xilligini taʼminlash maqsadida xakaton o‘zbek va ingliz tillarida, rus tiliga sinxron tarjima qilingan holda o‘tkaziladi. To‘laqonli muloqotni taʼminlash uchun har bir jamoada ingliz tilini biladigan kamida bitta ishtirokchi bo‘lishi kerak.
Hack4DigitalVillages yaxshi beshta jamoani umumiy qiymati 13,000 dollar bo‘lgan texnik jihozlar bilan mukofotlaydi, shuningdek doimiy murabbiylik va qo‘llab-quvvatlash imkoniyatini taqdim etadi. Murabbiylik to‘plami har bir jamoaning ehtiyojlariga moslashtirilgan individual murabbiylik mashg‘ulotlari, olti oy davomida IT Park ofis maydoni, kompyuterlar va 3D printerlaridan foydalanish imkoniyatini o‘z ichiga oladi. Ushbu tashabbusning asosiy maqsadi — g‘oliblarga ishlanmalarining ilmiy asoslarini kengaytirish va mustahkamlash imkoniyatini taqdim etgan holda o‘z g‘oyalarini muvaffaqiyatli biznes loyihalarga aylantirishga ko‘maklashish.
Arizalar 2023-yil 22-noyabr soat 18:00 ga qadar quyidagi havola orqali qabul qilinadi: https://forms.gle/jgn5SnBa3LdqEG3M9
Hack4DigitalVillages innovatsion xakatoni — BMT FAO va YXHTning O‘zbekistondagi loyihalari koordinatorining ikkita tashabbusi doirasidagi maxsus tadbir.
BMT FAO ning O‘zbekistondagi Digital Villages Initiative (DVI) tashabbusi qishloq xo‘jaligi mahsuldorligini oshirish, fermerlarning raqamli xizmatlardan foydalanish imkoniyatlarini kengaytirish va Farg‘ona vodiysining qishloq hududlarida hayot sifatini yaxshilashga qaratilgan. DVI tashabbusi Novkent va Yuksalish qishloqlarini raqamli rivojlanish bosqichiga yo‘naltirish maqsadida 2023-yili O‘zbekistonda ishga tushirilgan. Ushbu tashabbus jamoatchilik ishtirokiga asoslangan bo‘lib, qishloq aholisi, ayniqsa, yoshlarning qishloq jamoalari duch keladigan muammolarni birgalikda aniqlash va hal qilish imkoniyatlarini kengaytirishga qaratilgan.
O‘zbekistondagi DVI loyihasi bir nechta asosiy elementlarni, jumladan issiqxonalar uchun ochiq kodli IoT-qurilmalarini yig‘ishni o‘z ichiga oladi. Shuningdek, loyiha davomida ushbu qurilmalar Digital Village Camp doirasida kichik fermerlar orasida tajriba sifatida joriy etiladi. Bundan tashqari, maqsadli jamoalarda raqamli savodxonlik va tadbirkorlik bo‘yicha o‘quv dasturlarini integratsiyalash va Digital Villages Hub — hamjamiyatlar o‘rtasida bilim almashish uchun raqamli platformani yaratish, shuningdek Telegram va YouTubeʼda qishloq xo‘jaligi bo‘yicha maxsus bilim va tajribalarning raqamli omborini yaratish amalga oshiriladi.
Shu bilan bir vaqtda, har hafta “DVI Living Labs” onlayn sessiyalari o‘tkaziladi, bunda Novkent va Yuksalish qishloq jamoalari muhim mavzularni muhokama qilish va onlayn video chat orqali bilim almashish uchun mutaxassislarni taklif qilish imkoniyatiga ega bo‘ladilar. Bundan tashqari, DVI loyihasi doirasida Tojikistondagi DVI hamjamiyati bilan birgalikda rivojlanishga ko‘maklashish maqsadida maxsus tadbirlar tashkil etiladi. Ushbu tadbirlar Hack4DigitalVillages innovatsion xakatoni bilan yakunlanadi.
Iqtisodiy rivojlanishni qo‘llab-quvvatlash loyihasi doirasida YeXHTning O‘zbekistondagi loyihalari koordinatori (PCUz) kichik biznesni rivojlantirishni qo‘llab-quvvatlaydi va IT va raqamlashtirish orqali yoshlarni ish bilan taʼminlash imkoniyatlarini oshiradi. Yillar davomida PCUz salohiyatni oshirish bo‘yicha keng ko‘lamli tashabbus va chora-tadbirlarni qo‘llab-quvvatlab kelmoqda. Bularga O‘zbekiston yoshlarining biznes, raqamli va IT salohiyatini mustahkamlashga xizmat qiluvchi akseleratsiya dasturlari, xakatonlar, IT-tanlovlar, inkubatsiya dasturlari kiradi.
Quyidagi havola orqali Digital Villages Initiative tashabbusi haqida ko‘proq bilib oling: https://www.fao.org/digital-villages-initiative/europe/en
Digital Villages Initiative tashabbusi Novkent va Yuksalish qishloqlaridagi aqlli sensorlar va jonli laboratoriyalar orqali qanday taʼsir o‘tkazgani haqida ko‘proq bilib oling: https://www.fao.org/fao-stories/article/en/c/1649838/
Reklama huquqi asosida.
Izoh (0)