Vilnyusdagi sammitda NATO Xitoyning siyosati va ambitsiyalari alyans qadriyatlariga qarshi bo‘layotganini ma’lum qildi. Bunga javoban Xitoy Osiyo mintaqasida o‘z manfaatlarini himoya qilishini bildirdi, deyiladi Xitoyning Yevropa Ittifoqidagi diplomatik vakolatxonasi bayonotida.
“Biz NATOga shuni ochiq aytamiz, Xitoy o‘z suvereniteti, xavfsizligi va taraqqiyot manfaatlarini qatʼiy himoya qiladi. NATOning Osiyo-Tinch okeani mintaqasida sharqqa tomon kengayishiga qatʼiy qarshimiz. Xitoyning qonuniy huquq va manfaatlariga ziyon yetkazadigan har qanday harakatlar qat’iy rad etiladi”, — deyiladi diplomatik missiya xabarida.
Shuningdek, bayonotda “xalqaro xavfsizlik bilan bog‘liq vaziyatning yomonlashuvi sharoitida” alyansning harakatlaridan xavotir bildirilgan. Xitoy tomonining fikricha, NATO “o‘z zimmasidagi mas’uliyatni o‘ylamayapti”, atom energetikasi sohasidagi bayonotlar bilan qarama-qarshilik va keskinlikni kuchaytirmoqda.
NATO 11-iyul kuni Vilnyus sammiti chog‘ida eʼlon qilingan kommyunikeda Xitoyning “ambitsiyalari va majburlash siyosati alyans manfaatlari, xavfsizligi va qadriyatlariga qarshi chiqayotgani” taʼkidlangan.
Ular, shuningdek, Rossiya va Xitoy hamkorligini tanqid qilib, Pekinni Rossiyaning Ukrainadagi urishini qoralashga chaqirgan. Alyans Xitoy bilan hamkorlikka ochiq ekanini, biroq, avvalo, o‘z manfaatlarini himoya qilishini qayd etgan.
Kommyunikeda asosiy e’tibor Rossiyaga qaratilgan. Mamlakat Ukrainadagi jangovar harakatlarni to’xtatishga chaqirildi va NATO chegaralari yaqinida Moskvadan yadroviy tahdidlar kuchayib borayotgani ta’kidlandi.
“NATO qarama-qarshilikka intilmaydi va Rossiyaga tahdid solmaydi. Uning dushmanona siyosati va harakatlaridan kelib chiqib, biz Rossiyani o‘z hamkorimiz deb hisoblay olmaymiz”, — deb xulosa qildi alyans, ammo ular Moskva bilan aloqa kanallarini saqlab qolishga tayyor ekanini qo‘shimcha qildi.
Rossiyaning AQSHdagi elchisi Anatoliy Antonovning aytishicha, NATO sammiti alyansning Rossiya chegaralari yaqinida qo‘shinlarni jamlashga eʼtibor qaratayotganini ko‘rsatadi va uning Rossiyaga qarshi yo‘nalishda ekanini tasdiqlaydi.
Izoh (0)