Surxondaryo viloyati Sariosiyo tumani Sangardak qishlog‘ida 110 milliard so‘mga sanatoriy qurilmoqda. Bu haqda viloyat matbuot xizmati xabar berdi.
Ma’lum qilinishicha, 20-may kuni Surxondaryo viloyat hokimi Ulug‘bek Qosimov Kasaba uyushmalari federatsiyasi tomonidan qurilayotgan, umumiy qiymati 110 milliard so‘m bo‘lgan, 7 qavatli, 200 o‘rinli “Sangardak” sanatoriysida olib borilayotgan qurilish-taʼmirlash ishlari bilan tanishgan.
“O‘ziga xos tabiati, sharsharasi va musaffo havosi sabab mahalliy va xorijlik sayyohlarning sevimli maskanlaridan biriga aylangan Sangardak qishlog‘ida bu kabi sanatoriylarning barpo etilishi ekoturizm rivojiga xizmat qiladi”, — deyiladi xabarda.
Viloyat rahbari qurilish-taʼmirlash ishlarini sifatli olib borish va loyihani o‘z muddatida foydalanishga topshirish, shuningdek, mutasaddilarga sihatgoh qurilishida yuzaga kelayotgan muammolar, xususan, suv va elektr energiyasi taʼminoti masalasini o‘rganib, hal etish vazifasini yuklagan.
Mart o‘rtalarida O‘zbekiston kasaba uyushmalari federatsiyasi tomonidan Qoraqalpog‘istonning Bo‘zatov tumanida “Bo‘zatov” sanatoriysi qurilishi boshlangandi. Mazkur loyihaga kasaba uyushmalari federatsiyasi tomonidan 123 milliard so‘m yo‘naltirilib, loyiha uchun 7,2 gektar yer maydoni ajratilgan, Loyiha natijasida 120 ish o‘rni yaratilishi belgilangan.
Izoh (0)