Rossiya poytaxti Moskvada 1-may kuni Ukraina sharqidagi frontda egallangan NATO harbiy texnikalari ko‘rgazmasi tashkil etildi. Bu haqda “TASS” nashri xabar berdi.
Manbada aytilishicha, ko‘rgazma Moskvaning Poklonnaya tepaligidagi G‘alaba muzeyi qarshisida tashkil etilgan. NATO harbiy texnikalari ko‘rgazmasi 32 ta turli xil zirhli texnikani o‘z ichiga olgan.
“Ko‘rgazmada rossiyalik harbiy xizmatchilar tomonidan maxsus harbiy operatsiya zonasida qo‘lga olingan harbiy texnikaning turli namunalari taqdim etildi. Ko‘rgazmada hammasi bo‘lib 32 ta eksponat mavjud”, — degan Rossiya Qurolli kuchlari markaziy muzeyi katta ilmiy xodimi Andrey Lyubchikov.
Xabarda aytilishicha, ko‘rgazmada Germaniyada ishlab chiqarilgan Leopard 2 tanki, American Abrams tanklari, Bradley jangovar mashinasi, M113 va MaxxPro modellari, Turkiyada ishlab chiqarilgan BMC Kirpi tezyurarlari, Buyuk Britaniyada ishlab chiqarilgan Mastiff, Shvetsiyaning CV90 jangovar avtomobillari, shuningdek, boshqa ko‘plab qurollar ko‘rsatilgan. Ushbu texnikalar harbiy operatsiya paytida rus harbiylari tomonidan qo‘lga kiritilgani aytilgan.
Ko‘rgazmada bir qancha o‘qotar qurollar, hujjatlar, xaritalar, harbiy jihozlar va dronlar ham namoyish etilishi aytilgan. Ushbu ko‘rgazma bir necha kun davom etilishi maʼlum qilingan.
Izoh (0)