“Daryo”da Toshkent shahri Yangihayot tuman prokuraturasi binosi qurilishi uchun tadbirkor Sheroz Abduqodirovdan 190 million so‘mlik metall sotib olingani, biroq puli to‘lanmagani, shuningdek, bu bino qurilishi 33 nafar yollanma ishchining 160 million so‘mlik maoshini ham “yutib yuborgani” xabar berilgandi. Maqola jamoatchilikka e’lon qilingach, Bosh prokuratura bunga munosabat bildirib, vaziyat nazoratga olinganini ma’lum qildi.
Bosh prokuratura axborot xizmati rahbari Hayot Shamsutdinovning “Daryo”ga qo‘shimcha qilishicha, bino qurilishi uchun 190 million so‘m metall sotib olib, pulini bermagan quruvchiga jinoyat ishi qo‘zg‘atilgan.
Aniqlanishicha, Yangihayot tumani prokuraturasi binosini qurish yuzasidan o‘tkazilgan tender savdolarida “Qoraqalpoq-Barhayot” MCHJ g‘olib deb topilib, buyurtmachi tashkilot — shahar hokimligi huzuridagi “Yagona buyurtmachi xizmati” injiniring kompaniyasi UK va “Qoraqalpoq-Barhayot” MCHJ o‘rtasida pudrat shartnomasi imzolangan. Bosh pudratchi “Qoraqalpoq-Barhayot” MCHJ tomonidan “Nur Sobiroff” MCHJ bilan jami 4 ta subpudrat shartnomalari imzolangan.
Xususan, 2023-yilning 26-oktyabr kuni tuzilgan shartnomaga ko‘ra, “Qoraqalpoq-barhayot” MCHJ qurilish obyektidagi 4 turdagi ishlar uchun “Nur Sobiroff” MCHJga jami 1 milliard 473 million so‘m pul mablag‘lari o‘tkazib bergan, amalda 1 milliard 69 million so‘mlik ishlar bajarilgan. Amalda bajarilmagan ishlar bo‘yicha to‘langan pullarni qaytarish haqida “Qoraqalpoq-barhayot” MCHJ tomonidan bugungi kunga qadar sudga murojaat qilinmagan, deydi Hayot Shamsutdinov.
Mas’ul tashkilot shuningdek, ish haqi bilan bog‘liq muammoni ham o‘rganganini, bino qurilishida ishtirok etgan ishchilar ish haqini undirish bo‘yicha Fuqarolik ishlari bo‘yicha Samarqand shahar sudiga da’vo ariza kiritilganini bildirdi.
Tasdiqlangan loyiha-smeta hujjatlarida subpudrat tashkiloti “Nur Sobiroff” MCHJga shartnoma bo‘yicha berilgan ish hajmlari uchun ishchi kuchiga 97 million 600 ming so‘m mablag‘lar nazarda tutilganligi, ushbu mablag‘lar muqaddam ishchilarga to‘liq to‘lab berilganligi aniqlangan. Obyektda ishlatilgan ishchilar bilan rasmiy mehnat shartnomasi tuzilmasdan, ish haqi to‘g‘risida og‘zaki kelishuv bo‘lganligi aniqlanib, ishchilarning tuman prokuraturasiga yozgan arizasiga asosan Sergeli tumani Kambag‘allikni qisqartirish va bandlikka ko‘maklashish bo‘limi tomonidan ishchilarning manfaatida “Nur Sobiroff” MCHJdan ish haqini undirish bo‘yicha fuqarolik ishlari bo‘yicha Samarqand shahar sudiga da’vo ariza kiritilgan, deydi mas’ul.
Ta’kidlanishicha, “Nur Sobiroff” MCHJ mansabdor shaxslari va boshqalar juda ko‘p miqdorda firibgarlik qilishda ayblanib, ularga nisbatan jinoyat ishi qo‘zg‘atilgan.
“Daryo.uz” saytiga murojaat qilgan Sheroz Abduqodirov metall mahsulotlari yetkazib berish bo‘yicha “Nur Sobiroff” MCHJ rahbari M.Sobirov bilan og‘zaki kelishganligini, yetkazib berilgan mahsulotlarning bir qismi bo‘yicha 190 million so‘m to‘lab berilmaganligini ma’lum qildi. Fuqaro Sheroz Abduqodirovning arizasi o‘rganilib, natijasiga ko‘ra “Nur Sobiroff” MCHJ mansabdor shaxslari va boshqalarga nisbatan Jinoyat kodeksining 168-moddasi 4-qismi “a” bandi (juda ko‘p miqdorda firibgarlik) bilan jinoyat ishi qo‘zg‘atilib, dastlabki tergov harakatlari amalga oshirilmoqda, deydi Hayot Shamsutdinov.
Izoh (0)