Toshkent shahri Yangihayot tuman prokuraturasining yangi binosi qurilish buyumlari sotish bilan shug‘ullanuvchi tadbirkor Sheroz Abduqodirovga qimmatga tushmoqda. Bino qurilishi uchun 190 million so‘m qiymatidagi metallini sotgan tadbirkor pulini ololmay sarson bo‘lmoqda. Shuningdek, bu bino qurilishi 33 nafar yollanma ishchining 160 million so‘mlik maoshini ham “yutib yuborgan”.
Tuman prokuraturasi binosini qurayotgan Muzaffar ismli quruvchiga qiymati 190 million so‘m bo‘lgan metall sotganman. Oldi-sotdi jarayoni odatdagidek og‘zaki bo‘lgan. 2023-yilning dekabr oyida, 2024-yilning yanvar oyida pulimni berishlarini va’da qilishgandi. Ammo va’da bajarilmadi. Men esa pulimni ololmay sarsonman, deydi bu haqda “Daryo”ga murojaat qilgan Sheroz Abduqodirov.
Tadbirkorning ma’lumot berishicha, ayni kunga kelib tuman prokuraturasi binosini qurayotgan quruvchi ishdan chetlatilgan.
Bino qurilishi bosh pudratchi “Qoraqalpoq-barhayot” MCHJ nazoratida “Nur Sobiroff” korxonasi tomonidan olib borilayotgan edi. Lekin ayni kunda qurilish ishlari “Nur Sobiroff” korxonasidan olib qo‘yilgan va bosh pudratchi tomonidan davom ettirilmoqda, deydi tadbirkor.
“Daryo” jurnalisti bilan suhbatlashgan Muzaffar Rajabovning aytishicha, uning mas’ulligidagi “Nur Sobiroff” korxonasi bosh pudratchi tomonidan qurilish ishlaridan chetlatilib, hatto xizmat haqi ham to‘liq to‘lanmagan. “Qoraqalpoq-barhayot” MCHJ ta’sischisi esa “Nur Sobiroff” korxonasiga chala ishlari uchun 1 milliard 200 million so‘m miqdoridagi mablag‘ o‘tkazib berilganini aytmoqda.
Ortiqchasi bilan to‘ladik. Qilingan ishlarni hisob qilganimizda aslida 800 million so‘mlik ish bajarilgani ma’lum bo‘ldi. Shunga qaramasdan, biz unga 1 milliard 200 million so‘m mablag‘ o‘tkazib berganmiz. Aslida, biz emas, ular bizning haqqimizni yegan bo‘lib chiqmoqda, deydi jurnalistning bu haqdagi savoliga javob bergan “Qoraqalpoq-barhayot” MCHJning Shohjahon ismli ta’sischisi.
Mas’ul gapini isbotlash uchun hujjat taqdim qilishini bildirdi. Biroq hujjatlarda “Qoraqalpoq-barhayot” MCHJ “Nur Sobiroff” korxonasiga qilingan ishlar uchun 1 milliard 27 million so‘m miqdorida pul o‘tkazib bergani ma’lum bo‘ldi.
“Daryo” jurnalistining aniqlashtirishicha, ushbu bino qurilishida ishtirok etgan 33 nafar ishchining 160 million so‘mlik maoshi ham “urib qolingan”.
2023-yilning noyabr oyida shu bino qurilishida ishlay boshladik. Lekin Yangi yilgacha bir tiyin ham berishmadi. Bayramni ham pulsiz o‘tkazdik. Ko‘p joyga murojaat qilganimizdan so‘ng, 100 million so‘m avans berishdi. Yana 160 million so‘m pulimiz bor edi. O‘sha pulni ololmadik. Qolib ketdi. Haligacha berishmadi. Shohjahon aka 10 ming dollar beraman, qolganiga rozi bo‘lasizlar, degandi. Lekin o‘sha pul ham berilmadi, deydi o‘zini Otabek deb tanishtirgan quruvchi.
Toshkent shahar hokimligi “Yagona buyurtmachi xizmati” injiniring kompaniyasi bo‘lib, obyektning dastlabki qiymati sifatida respublika byudjetidan 14 milliard 493 million so‘m ajratilishi belgilangan. Obyektning iqtisod qilingandan so‘nggi qiymati 12 milliard 356 million so‘mni tashkil qilgan. Ayni paytda bu ish uchun 9 milliard 482 million so‘m moliyalashtirilgan bo‘lib, amalda 9 milliard so‘mlik ish bajarilgan.
Yangihayot tumani prokurori o‘rinbosari Aziz ismli suhbatdosh bino qurilishi bilan bog‘liq hech qanday muammo yo‘qligini, hech kimning haqqiga xiyonat qilinmayotganini aytib, Shohjahon ismli quruvchiga “Daryo”ga yetarlicha axborotlar berishi kerakligini uqtirdi. Quruvchi jurnalistga faqatgina “Qoraqalpoq-barhayot” MCHJ hisobidan “Nur Sobiroff” korxonasiga qancha mablag‘ o‘tkazilgani haqidagi ma’lumotnigina berish bilan cheklandi.
“Daryo” mazkur masala yuzasidan mas’ullarning qo‘shimcha izohi, dalillarini e’lon qilishga tayyorligini ma’lum qiladi.
Izoh (0)