Toshkentda 12 yoshli qizning zo‘rlanib, o‘ldirilgani yuzasidan jinoyat ishi sudga oshirildi

Toshkent shahar Yangihayot tumanida 12 yoshli qizni zo‘rlab, so‘ng uni o‘ldirgan erkak ishi sudga yuborildi. Bu haqda Bosh prokuratura matbuot xizmati rahbari Hayot Shamsutdinov ma’lum qildi.

“Yangihayot tumanida sodir etilgan 12 yoshli qizning qotilligi bilan bog‘liq jinoyat ishi ayblov xulosasi bilan mazmunan ko‘rib chiqish uchun sudga yuborildi”, — deyiladi xabarda.

Yangihayot tumanida 31-yanvar kuni 12 yoshli qizning murdasi zo‘rlik va qotillik alomatlari bilan topilgandi. Holat yuzasidan Yangihayot tumani prokuraturasi tomonidan Jinoyat kodeksining 97-moddasi 2-qismi “v, z” bandlari (aybdorga ayon bo‘lgan ojiz ahvoldagi shaxsni nomusga tegish yoki jinsiy ehtiyojni zo‘rlik ishlatib g‘ayritabiiy usulda qondirish bilan bog‘liq holda qasddan o‘ldirish) bilan jinoyat ishi qo‘zg‘atilgan.

Jinoyat ishi bo‘yicha gumonlanuvchi shaxs (29 yoshli erkak) Jinoyat-protsessual kodeksining 221-moddasi tartibida ushlangan. Gumonlanuvchi shaxs marhumaning xonadonida 2022-yilning yoz oylarida yollanma ishchi sifatida ta’mirlash ishlarini amalga oshirgan.

Shundan so‘ng Toshkent shahri Oila va xotin-qizlar boshqarmasi maktab o‘quvchilarining ota-onalariga murojaat qilgandi. Ta‘kidlanishicha, ota-onalar farzandlariga o‘zi hamrohlik qilishi va maktabga olib borib maktabdan olib ketishi kerak. Ular bilan doimo aloqada bo‘lib turish lozim.