“Daryo”da Toshkentdagi prokuratura binosining qurilishi tadbirkorga 190, quruvchilarga esa 160 mln so‘m zarar keltirilayotgani xabar berilgandi. Bosh prokuratura axborot xizmati rahbari Hayot Shamsutdinovning tahririyatga ma’lum qilishicha, holat nazoratga olingan. Natijasi haqida qo‘shimcha xabar qilinadi.
Aniqlanishicha, Yangihayot tuman prokuraturasining binosi qurilishi uchun quruvchiga 190 million so‘mlik metall sotgan tadbirkor Sheroz Abduqodirov pulini ololmay sarson bo‘lmoqda. Shuningdek, bu bino qurilishini boshlagan quruvchi 33 nafar yollanma ishchini ishlatib, ularning 160 million so‘mlik maoshini ham bermay yuribdi.
Tuman prokuraturasi binosini qurayotgan Muzaffar ismli quruvchiga qiymati 190 million so‘m bo‘lgan metall sotganman. Oldi-sotdi jarayoni odatdagidek og‘zaki bo‘lgan. 2023-yilning dekabr oyida, 2024-yilning yanvar oyida pulimni berishlarini va’da qilishgandi. Ammo va’da bajarilmadi. Men esa pulimni ololmay sarsonman, degandi bu haqda “Daryo”ga murojaat qilgan Sheroz Abduqodirov.
Tadbirkorning ma’lumot berishicha, ayni kunga kelib tuman prokuraturasi binosini qurayotgan quruvchi ishdan chetlatilgan.
Bino qurilishi bosh pudratchi “Qoraqalpoq-barhayot” MCHJ nazoratida “Nur Sobiroff” korxonasi tomonidan olib borilayotgan edi. Lekin ayni kunda qurilish ishlari “Nur Sobiroff” korxonasidan olib qo‘yilgan va bosh pudratchi tomonidan davom ettirilmoqda, deydi tadbirkor.
“Daryo” jurnalistining aniqlashtirishicha, ushbu bino qurilishida ishtirok etgan 33 nafar ishchining 160 million so‘mlik maoshi ham “urib qolingan”.
2023-yilning noyabr oyida shu bino qurilishida ishlay boshladik. Lekin Yangi yilgacha bir tiyin ham berishmadi. Bayramni ham pulsiz o‘tkazdik. Ko‘p joyga murojaat qilganimizdan so‘ng, 100 million so‘m avans berishdi. Yana 160 million so‘m pulimiz bor edi. O‘sha pulni ololmadik. Qolib ketdi. Haligacha berishmadi. Shohjahon aka 10 ming dollar beraman, qolganiga rozi bo‘lasizlar, degandi. Lekin o‘sha pul ham berilmadi, degandi o‘zini Otabek deb tanishtirgan quruvchi.
Izoh (0)