O‘zbekiston Bosh konsulxonasi xodimlari BAAning Sharja aeroportida sodir bo‘lgan baxtsiz hodisa oqibatida og‘ir jarohat olgan fuqaro holidan xabar oldi. Bu haqda “Dunyo” agentligi xabar berdi.
Qayd etilishicha, diplomatlar fuqaro S.Sh. holidan xabar olish uchun “Al Qassimi” kasalxonasiga tashrif buyurib, konsullik-huquqiy yordam ko‘rsatish yo‘nalishida bir qator masalalar, jumladan, tibbiy muolaja xarajatlarini mahalliy tashkilotlar tomondan qoplanishiga erishgan.
1955-yilda tug‘ilgan S.Sh. amalga oshirilgan konsullik-huquqiy tadbirlar natijasida O‘zbekistonga qaytarilgan. Fuqaro va uning hamrohi Uzbekistan Airways kompaniyasi tomonidan bepul taqdim qilingan aviachipta bilan O‘zbekistonga qaytib ketgan.
Shuningdek, S.Sh. kasalxonada davolanishi mobaynida uning BAAda bo‘lib turgan qarindoshlariga Sharja xalqaro aeroporti tomonidan bepul mehmonxona taqdim etilgan.
Bundan oldin Rossiyaga ishlash uchun borib, vafot etgan ayolning 9 yoshli qizi O‘zbekistonga qaytarilgani to‘g‘risida xabar berilgandi. Shuningdek, Misrda avtohalokatga uchrab, og‘ir tan jarohati olgan o‘zbekistonlik ayol vatanga qaytarilgan, Rossiyada eri qamalib, chaqalog‘i bilan qiyin ahvolda qolgan ayolga yordam ko‘rsatilgan edi.
Izoh (0)