Iqtisodiyot va moliya vazirligi hamda Xalqaro islom savdo-moliya korporatsiyasi (ITFC) o‘rtasidagi iqtisodiy hamkorlikni chuqurlashtirish maqsadida 100 million dollar miqdoridagi “Murabaha” moliyalashtirish bitimi va agentlik kelishuvi imzolandi. Bu haqda vazirlik matbuot xizmati xabar berdi.
Qayd etilishicha, mazkur bitim Iqtisodiyot va moliya vazirligi huzuridagi Qishloq xo‘jaligini davlat tomonidan qo‘llab-quvvatlash jamg‘armasi orqali respublikada oziq-ovqat xavfsizligini mustahkamlashga qaratilgan.
Mablag‘lar 24 oygacha bo‘lgan muddatga qulay shartlarda ikki transhda ajratiladi. Ushbu mablag‘lar O‘zbekiston aholisining ehtiyojlarini qondirish, mamlakat agrar sektorining barqarorligi va rivojlanishini qo‘llab-quvvatlashga imkon beradi.
Shu bilan birga, ITFC vakillari bilan kelgusida boshqa sohalarni rivojlantirish bo‘yicha hamkorlik qilishga kelishib olingan.
Xalqaro Islom savdo-moliya korporatsiyasi (ITFC) Islom taraqqiyot bankining asosiy instituti bo‘lib, uning vazifasi Islom hamkorlik tashkilotiga a’zo davlatlar o‘rtasida iqtisodiy o‘sish va savdoni rivojlantirishni rag‘batlantirishdan iborat.
Eslatib o‘tamiz, o‘tgan yili sentyabr oxirlarida Osiyo taraqqiyot banki (OTB) O‘zbekistonning 2023 va 2024-yil uchun iqtisodiy o‘sish prognozini yaxshilagandi. Undan avvalroq esa OTB O‘zbekiston energiya taqsimlash tizimini raqamlashtirishga 200 mln dollar qarz ajratishi ma’lum bo‘lgan edi.
Izoh (0)