Misrda avtohalokatga uchrab, og‘ir tan jarohati olgan o‘zbekistonlik ayol ikki oy davolanishdan so‘ng vatanga qaytarildi. Bu haqda “Dunyo” AA xabar berdi.
O‘zbekistonning Misrdagi elchixonasi bergan xabarga ko‘ra, O‘zbekiston fuqarosi S.N. 6-iyun kuni Qohira shahrida YTHga uchrab, og‘ir tan jarohati olgan.
Bemor tan jarohatlari bilan Qohira shahridagi shifoxonalarning biridagi intensiv terapiya bo‘limiga joylashtirilgan. O‘tkazilgan tekshiruvlar natijasida unga o‘pkada pnevmotoraks, tos suyagi va chap oyoq sinishi tashxisi qo‘yilgan hamda yuz va tanada ko‘plab gematomalar aniqlangan.
Qayd etilishicha, elchixona xodimlari birinchi kundan e’tiboran bemorning holatini muntazam nazoratga olgan. Jumladan, Misr Sog‘liqni saqlash vazirligining amaliy ko‘magida bemor 12-iyun kuni Qohirada nufuzli va yirik hisoblangan “Naser tadqiqotlar va davolash instituti” klinikasiga Misr hukumati insonparvarlik yordami tariqasida bepul muolaja uchun joylashtirilib, ikki oyga yaqin vaqt mobaynida shifoxonada bemor uchun kerakli barcha tegishli tibbiy ko‘rik va tadqiqotlar amalga oshirilgan.
Qohiradagi elchixona, Uzbekistan Airways, Misr Sog‘liqni saqlash vazirligi va O‘zbekistondan yetib kelgan mutaxassislar ko‘magida fuqaro S.N. Sharm ash-Shayx—Toshkent yo‘nalishidagi reys orqali 5-avgust kuni O‘zbekistonga olib kelingan.
“Elchixona Misrga borishni rejalashtirgan barcha vatandoshlarimizga xorijga chiqishdan oldin tibbiy sug‘urta qildirishni, o‘zga yurtda bo‘lish chog‘ida o‘z xavfsizliklari uchun g‘amxo‘rlik qilishlarini so‘raydi”, — deyiladi xabarda.
Izoh (0)