“Bavariya” sobiq futbolchisi Aryen Robben 42 kilometrdan ortiqroq masofani tashkil qilgan Rotterdam marafonini yugurib o‘tdi.
39 yoshli Robben 2 yil avval futbolchilik faoliyatini butunlay yakunlagandi, ammo hali ham ajoyib sport formasini ushlab turibdi. Shu kunlarda u Rotterdam marafonini (42,195 kilometr) deyarli 3 soat vaqtda yugurib o‘tdi. Robben 2 soat 58 daqiqa 33 soniyada marraga yetib keldi. “Men haqiqatdan ham sindim, lekin buni bajara oldim”, — dedi Robben finish chizig‘iga yetib kelgach.
Sobiq futbolchi biroz dam olgach, to‘liq izoh berdi.
Men sprinterman. Bu juda katta masofa. Ba’zilar meni aqldan ozgan deb o‘ylamoqda. Lekin do‘stim Erben Vennemarsning aytishicha, agar sportchiga aylansang, umringni oxirigacha shunday bo‘lib qolasan. Men allaqachon top-sportchi emasman, lekin shuni aytishim mumkinki bu masofani uch soatda bosib o‘tganimni katta natija deb hisoblayman. Bu titul yutish bilan bir xil, — dedi niderlandiyalik sobiq futbolchi.
Robben 2022-yilda marafonni hozirgidan 15 daqiqa sekinroq bosib o‘tgan
Robben yugurishga 2021-yildan qiziqishni boshlagan, 2022-yilda esa o‘zining birinchi marafonini yugurib o‘tdi. Sobiq hujumchi 2022-yilda 42,195 kilometrni 3 soat-u 13 daqiqa 57 soniyada 2023-yilgi natijadan 15 daqiqa sekinroq bosib o‘tgandi. Unda Aryen 1-o‘rinni olgan sportchidan 69 daqiqa ortda qolgandi.
“Unchalik quvonarli bo‘lmadi, lekin men buni bajara oldim. Marafonni ko‘rishga kelgan muxlislar meni qo‘llab-quvvatladi. Bu uchun ularga rahmat. Boshida vaqt haqida ko‘p o‘yladim, keyin esa hamma xavotirlarimni miyamdan chiqarib tashladim. Ba’zilar aqldan ozgansan, deydi. Lekin men shunchaki sportning muxlisiman”, — dedi Robben.
Robben 2019-yilda suzish bo‘yicha xayriya musobaqasida qatnashib, 8 kilometr masofani suzib o‘tgandi
Aryen Robben 2019-yilning yozida futbolchilik faoliyatini yakunlashini e’lon qildi. O‘sha vaqtda 35 yosh bo‘lgan futbolchi “Bavariya”dan keyin hech qaysi jamoada o‘ynashni xohlamadi. Lekin o‘zini Niderlandiyadagi xayriya suzish musobaqasida sinab ko‘rdi.
Zutkamp va Groningen shaharlari orasidagi 35 kilometr atrofidagi masofani 170 nafardan ortiq sportchi suzib o‘tdi. Aryen to‘liq masofani suzib o‘tmadi va so‘nggi bosqichda musobaqaga qo‘shilib, oxirgi 8 kilometr masofani suzib o‘tdi.
“Men bu chellenjni ancha yildan beri kuzatib kelayotgandim. Endi esa o‘zimda ham suzish imkoniyati bor. 8 kilometrni suzib o‘tish bunday masofaga o‘rganmaganlar uchun katta muammo. Lekin menga yaxshilik uchun nimadir qilish yoqadi”, — degandi niderlandiyalik sobiq futbolchi.
Izoh (0)