Dunyo va o‘zbek sportiga oid 15-iyul kunining muhim xabarlari dayjesti bilan tanishing.
O‘zbekiston
O‘zbekistonlik ikki hujumchi Belarus klubiga o‘tdi. “Energetik-BGU” o‘zbekistonlik futbolchilar Bobur Abduxoliqov va Shahboz Ubaydullayev transferini e’lon qildi. Abduxoliqov Ukrainaning “Rux” klubini tark etgan bo‘lsa, Ubaydullayev Belarusning “Shaxtyor Soligorsk”idan keldi.Eslatib o‘tamiz, “Energetik-BGU” safida 2020-yilgi mavsumda uch nafar o‘zbekistonlik futbolchi (Jasur Yaxshiboyev, Shahboz Umarov va Humoyunmirzo Iminov) to‘p surgandi.
O‘zbekistonlik futbolchi qizlar CAFA U-23 Women’s Championship musobaqasida ishtirok etadi. Tojikistonda 18—27-avgust kunlari 23 yoshgacha bo‘lgan Markaziy Osiyo mamlakatlari futbolchi qizlari o‘rtasida xalqaro musobaqa bo‘lib o‘tadi. Unda O‘zbekiston U-23 terma jamoasi Eron, Qirg‘iziston, Afg‘oniston va Tojikiston vakillariga qarshi bahs olib boradi. Musobaqa guruh bosqichidan iborat bo‘lib, yakunda eng ko‘p ochko to‘plagan jamoa g‘olib bo‘ladi.
Jahon
Shimoliy Amerika mintaqasida KONKAKAF Oltin Kubogi davom etmoqda. Musobaqada Qatar terma jamoasi ham ishtirok etmoqda. Amaldagi Osiyo chempioni dastlabki turda Panamaga qarshi bahs olib bordi va 3:3 hisobidagi jangovar durang qayd etdi. Shu tariqa Qatar terma jamoasi uchta mintaqa chempionatida (Osiyo Kubogi, Kopa Amerika, Oltin Kubogi) ishtirok etgan tarixdagi ilk terma jamoaga aylandi. Qatarliklar hujumchisi Almoiz Ali esa uchta turli mintaqa bosh musobaqasida gol urgan birinchi futbolchi bo‘ldi.Bundesliga o‘yinlariga tomoshabinlar qaytariladi. Bundesligada muxlislar nafaqat uy o‘yinlarida, balki, safar bahslariga borishi mumkin bo‘ladi. Har bir stadiondagi ruxsat etilgan muxlislar soni o‘sha hududdagi vaziyat va stadionda yo‘lga qo‘yilgan sharoitlarga bog‘liq bo‘ladi. Bundan tashqari Bundesliga 2021/22-yilgi mavsumida bir o‘yinda jamoalarga beshtadan zaxira almashtirish imkoniyati taqdim etiladi.
Aryen Robben yana faoliyatini yakunlaganini e’lon qildi. “Bavariya”, “Real”, “Chelsi”, “PSV” va “Groningen” klublarida faoliyat yuritgan hujumkor yarim himoyachi Aryen Robben futbolchilik faoliyatini yakunlaganini ma’lum qildi. 37 yoshli futbolchi bu qarorga kelishiga muntazam jarohatlar sabab bo‘lganini ta’kidlab o‘tdi. Robben bundan avval 2019-yilda ham faoliyatini yakunlashini aytgan, biroq 2020-yilning yozida uni qayta tiklagandi. Robben faoliyati davomida 31 ta sovringa ega chiqdi.
Germaniyalik mashhur hakam Feliks Brix xalqaro maydondagi faoliyatini yakunladi. 45 yoshli mutaxassis Yevro—2020 dagi muvaffaqiyatli ishtirokdan keyin ushbu qarori haqida e’lon qildi. Katta futboldagi faoliyatini 2004-yilda boshlagan Brix oradan ikki yil o‘tib FIFA hakamiga aylangandi. Nemis faoliyati davomida 2014 va 2018-yilgi mundialda, shuningdek, “Real” va “Yuventus” o‘rtasidagi (4:1) YChL 2016/17-yilgi mavsumi finalida ishlagan. U Yevro—2020 da beshta o‘yinni, xususan, yarim final doirasidagi Italiya—Ispaniya uchrashuvini (1:1, penaltilar seriyasi — 4:2) boshqarib bordi.
Transfer yangiliklari
“Chelsi” Erling Holandni qo‘lga kiritishga jiddiy kirishmoqda. Sky Sports’ning xabar qilishicha, londonliklar Holand uchun Dortmund klubiga Temmi Abraham yoki Kallum Hadson-Odoini berishga tayyor ekanini ma’lum qilgan. Biroq “Borussiya” futbolchi bu yozda sotilmasligini aytgan. Italiyalik insayder Fabrisio Romanoga ko‘ra, nemis klubi 20 yoshli futbolchi borasida birorta ham taklif olmagan.
“Manchester Siti” Robert Levandovskiga qiziqish bildirmoqda. “Shaharliklar” 32 yoshli polshalik futbolchiga Harri Keynning alternativ varianti sifatida qaramoqda, deya xabar qilmoqda Daily Mail. Biroq Robertning myunxenliklar bilan amaldagi shartnomasi 2023-yil yoziga qadar amal qiladi. Avvalroq “Tottenhem” Keyn transferi borasida Manchester klubining 100 million funtlik taklifini rad etgani xabar qilingandi.
Izoh (0)