“Бавария” собиқ футболчиси Арьен Роббен 42 километрдан ортиқроқ масофани ташкил қилган Роттердам марафонини югуриб ўтди.
39 ёшли Роббен 2 йил аввал футболчилик фаолиятини бутунлай якунлаганди, аммо ҳали ҳам ажойиб спорт формасини ушлаб турибди. Шу кунларда у Роттердам марафонини (42,195 километр) деярли 3 соат вақтда югуриб ўтди. Роббен 2 соат 58 дақиқа 33 сонияда маррага етиб келди. “Мен ҳақиқатдан ҳам синдим, лекин буни бажара олдим”, — деди Роббен финиш чизиғига етиб келгач.
Собиқ футболчи бироз дам олгач, тўлиқ изоҳ берди.
Мен спринтерман. Бу жуда катта масофа. Баъзилар мени ақлдан озган деб ўйламоқда. Лекин дўстим Эрбен Веннемарснинг айтишича, агар спортчига айлансанг, умрингни охиригача шундай бўлиб қоласан. Мен аллақачон топ-спортчи эмасман, лекин шуни айтишим мумкинки бу масофани уч соатда босиб ўтганимни катта натижа деб ҳисоблайман. Бу титул ютиш билан бир хил, — деди нидерландиялик собиқ футболчи.
Роббен 2022 йилда марафонни ҳозиргидан 15 дақиқа секинроқ босиб ўтган
Роббен югуришга 2021 йилдан қизиқишни бошлаган, 2022 йилда эса ўзининг биринчи марафонини югуриб ўтди. Собиқ ҳужумчи 2022 йилда 42,195 километрни 3 соат-у 13 дақиқа 57 сонияда 2023 йилги натижадан 15 дақиқа секинроқ босиб ўтганди. Унда Арен 1-ўринни олган спортчидан 69 дақиқа ортда қолганди.
“Унчалик қувонарли бўлмади, лекин мен буни бажара олдим. Марафонни кўришга келган мухлислар мени қўллаб-қувватлади. Бу учун уларга раҳмат. Бошида вақт ҳақида кўп ўйладим, кейин эса ҳамма хавотирларимни миямдан чиқариб ташладим. Баъзилар ақлдан озгансан, дейди. Лекин мен шунчаки спортнинг мухлисиман”, — деди Роббен.
Роббен 2019 йилда сузиш бўйича хайрия мусобақасида қатнашиб, 8 километр масофани сузиб ўтганди
Арьен Роббен 2019 йилнинг ёзида футболчилик фаолиятини якунлашини эълон қилди. Ўша вақтда 35 ёш бўлган футболчи “Бавария”дан кейин ҳеч қайси жамоада ўйнашни хоҳламади. Лекин ўзини Нидерландиядаги хайрия сузиш мусобақасида синаб кўрди.
Зуткамп ва Гронинген шаҳарлари орасидаги 35 километр атрофидаги масофани 170 нафардан ортиқ спортчи сузиб ўтди. Арьен тўлиқ масофани сузиб ўтмади ва сўнгги босқичда мусобақага қўшилиб, охирги 8 километр масофани сузиб ўтди.
“Мен бу челленжни анча йилдан бери кузатиб келаётгандим. Энди эса ўзимда ҳам сузиш имконияти бор. 8 километрни сузиб ўтиш бундай масофага ўрганмаганлар учун катта муаммо. Лекин менга яхшилик учун нимадир қилиш ёқади”, — деганди нидерландиялик собиқ футболчи.
Изоҳ (0)