Germaniyada jurnalistlarga qarshi jinoyatlar soni keskin oshdi

2022-yilda Germaniyada jurnalistlarga qarshi 320 ta jinoyat sodir etilgan, deb yozmoqda Anadolu.

Germaniya hukumatining So‘l partiya yuborgan parlament so‘roviga javobida aytilishicha, 2022-yilda mamlakat bo‘ylab jurnalistlar va ommaviy axborot vositalari xodimlariga qarshi 320 ta jinoyat sodir etilgan.

Jami 46 zo‘ravonlik, 41 tahdid, 31 ta mulkka zarar yetkazish va 27 ta jamoatchilik provokatsiyasi holatlari qayd etilgan.

2021-yil Germaniyada jurnalistlarga qarshi 276 ta jinoyat sodir etilgan bo‘lsa, 2020-yilda bu ko‘rsatkich 260 tani tashkil etgan.

Hukumat hisobotiga ko‘ra, Germaniyada jurnalistlarga qarshi jinoyatlarning o‘sishi davom etmoqda.

Eslatib o‘tamiz, “Chegara bilmas muxbirlar” xalqaro nohukumat tashkilotining 2022-yil yakuni bo‘yicha hisobotiga ko‘ra, Meksika ketma-ket to‘rtinchi yil jurnalistlar uchun eng xavfli davlat deb topilgan bo‘lib, o‘tgan yili 11 nafar OAV xodimi halok bo‘lgan. Ro‘yxatda ikkinchi o‘rinni esa Ukraina egalladi.

Ma’lumot uchun, “Chegara bilmas muxbirlar” tomonidan tuziladigan So‘z erkinligi indeksining 2022-yilgi reytingida O‘zbekiston o‘z ko‘rsatkichlarini birdan 24 pozitsiyaga yaxshilab, 157-o‘rindan 133-o‘ringa ko‘tarilgan edi. Ushbu reytingda dastlabki uchlikni Norvegiya, Daniya va Shvetsiya egallagan. Rossiya esa 155-o‘ringa tushib ketgan. Reytingdagi oxirgi 180-o‘rinda Shimoliy Koreya, 179-o‘rinda Eritreya joylashgan.