Германияда журналистларга қарши жиноятлар сони кескин ошди

2022 йилда Германияда журналистларга қарши 320 та жиноят содир этилган, деб ёзмоқда Anadolu.

Германия ҳукуматининг Сўл партия юборган парламент сўровига жавобида айтилишича, 2022 йилда мамлакат бўйлаб журналистлар ва оммавий ахборот воситалари ходимларига қарши 320 та жиноят содир этилган.

Жами 46 зўравонлик, 41 таҳдид, 31 та мулкка зарар етказиш ва 27 та жамоатчилик провокацияси ҳолатлари қайд этилган.

2021 йил Германияда журналистларга қарши 276 та жиноят содир этилган бўлса, 2020 йилда бу кўрсаткич 260 тани ташкил этган.

Ҳукумат ҳисоботига кўра, Германияда журналистларга қарши жиноятларнинг ўсиши давом этмоқда.

Эслатиб ўтамиз, “Чегара билмас мухбирлар” халқаро ноҳукумат ташкилотининг 2022 йил якуни бўйича ҳисоботига кўра, Мексика кетма-кет тўртинчи йил журналистлар учун энг хавфли давлат деб топилган бўлиб, ўтган йили 11 нафар ОАВ ходими ҳалок бўлган. Рўйхатда иккинчи ўринни эса Украина эгаллади.

Маълумот учун, “Чегара билмас мухбирлар” томонидан тузиладиган Сўз эркинлиги индексининг 2022 йилги рейтингида Ўзбекистон ўз кўрсаткичларини бирдан 24 позицияга яхшилаб, 157-ўриндан 133-ўринга кўтарилган эди. Ушбу рейтингда дастлабки учликни Норвегия, Дания ва Швеция эгаллаган. Россия эса 155-ўринга тушиб кетган. Рейтингдаги охирги 180-ўринда Шимолий Корея, 179-ўринда Эритрея жойлашган.