Jo Bayden yaqin orada Si Szinpin bilan gaplashmoqchiligini ma’lum qildi

AQSH prezidenti Jo Bayden yaqin orada Xitoy rahbari Si Szinpin bilan gaplashish niyati borligini aytdi, deb yozmoqda Reuters.

AQSH AUKUS (Avstraliya, Buyuk Britaniya va AQSH qisqartmasi) harbiy ittifoqi doirasida Xitoydan himoyalanish uchun Avstraliyaga uchta yadro suvosti kemasini sotmoqda. 13-mart kuni Kaliforniya shtati San-Diego shahridagi Point Loma harbiy-dengiz bazasida uch davlat yetakchilari uchrashuv o‘tkazdi.

Pekin Avstraliya, Buyuk Britaniya va Qo‘shma Shtatlar o‘rtasidagi harbiy ittifoq rejalarini agressiya deb baholashidan xavotirdamisiz, degan savolga Bayden buni inkor qilishini aytdi. Shu bilan birga, yaqin orada Si Szinpin bilan gaplashasizmi, degan savolga Amerika yetakchisi: “Ha”, deb javob berdi. Biroq u suhbat qachon o‘tkazilishi mumkinligini aytmadi.

O‘tgan hafta Jeyk Sallivan Bayden Butunxitoy xalq vakillari yig‘ilishi tugaganidan keyin 13-mart kuni Xitoy rahbari bilan telefon orqali gaplashishi kutilayotgani haqida aytgandi.

AQSH 2030-yillar boshida Avstraliyaga Virginia sinfidagi uchta suvosti kemasini yetkazib beradi. Ular yadro bilan qurollanmaydi, balki atom elektr stantsiyasiga ega bo‘ladi. Agar kerak bo‘lsa, ularning soni beshtagacha oshirilishi mumkin. Avstraliya, shuningdek, 2027-yildan boshlab Amerikadan to‘rttagacha, Britaniyadan bitta suvosti kemalariga mezbonlik qiladi, bu esa Xitoyni yanada tiyib turishi kerak. Bundan tashqari, mamlakatlar birgalikda Buyuk Britaniya va Avstraliyada quriladigan yangi turdagi atom suvosti kemasi loyihasini ishlab chiqadi.

Rossiya va Xitoy AUKUS’ni bir necha bor tanqid qilgan. Ularning fikricha, yadroviy suvosti kemasi texnologiyasining Kanberraga o‘tkazilishi Yadro qurolini tarqatmaslik to‘g‘risidagi shartnomaga “katta zarar yetkazadi”.