O‘zbekistonda aholining kiberjinoyatlardan xabardorligini oshirishga qaratilgan innovatsion tanlovlar tashkil etiladi. Bu haqda IIV Kiberxavfsizlik markazi xabar berdi.
Qayd etilishicha, so‘nggi yillardagi axborot kommunikatsiya texnologiyalaridan foydalanib sodir etilgan jinoyatlarning o‘sish tendensiyasi saqlanib qolmoqda. Shu bois Toshkentning Olmazor, Chilonzor va Yunusobod tumanlarida bank kartalari bilan bog‘liq jinoyatlarning oldini olish va aholi orasida “raqamli immunitet”ni shakllantirish maqsadida Cyber 10 day kompleks targ‘ibot tadbirlarga start berilgan.
Cyber 10 day kompleks targ‘ibot-tashviqot tadbirlari “mahallabay”, “xonadonbay” va “fuqarobay” shaklidagi aholining har bir qatlami o‘rtasida individual yondashuv asosida olib boriladi. Tadbir davomida, korxona, tashkilot, muassasalar va taʼlim muassasalari, shuningdek, bozorlar, savdo komplekslari va jamoat joylari ham qamrab olinadi. Tadbirlarini yanada qizg‘in tus oldirish maqsadida taniqli sanʼatkorlar jalb etiladi.
Ularga bank karta boshqaruvini tasdiqlovchi kodni oshkor etish orqali pul mablag‘lari talon-toroj qilinishi hamda global tarmoq orqali sodir etilayotgan boshqa jinoyatlarning og‘ir oqibatlari xususida tushuntirish ishlari olib boriladi.
Tadbirlar davomida kiberjinoyatlarga qarshi kurashishni targ‘ib qiluvchi hamda kiberjinoyatlardan ogoh bo‘lishga qaratilgan 10 dan ortiq innovatsion yondashuv asosida tanlovlar o‘tkazilishi rejalashtirilgan. Jumladan:
- mahallalar o‘rtasida “Eng yaxshi mahalla”;
- katta yoshdagi aholi vakillari, nafaqaxo‘rlar ishtirokida “Bank kartasi kodini hech kimga bermayman” nomli;
- blogerlar o‘rtasida “Eng yaxshi kontent”;
- taʼlim muassasalaridagi yoshlar, ijodiy faoliyat bilan shug‘ullanuvchi aholi o‘rtasida “Eng yaxshi monolog”, “Eng yaxshi insho”, “Eng yaxshi sheʼr” tanlovlari;
- 30 yoshgacha bo‘lgan yoshlar o‘rtasida “Kiberxavfsizlik bilimdonlari” intellektual o‘yinlari shular jumlasidandir.
Kompleks targ‘ibot-tashviqot tadbirlari 2023-yilning 1-mart kuniga qadar davom etib, tanlovlarda faol ishtirok etgan g‘olib va sovrindorlarni taqdirlash tadbirlari Yoshlar ijod saroyida o‘tkazilishi belgilangan.
Ma’lumot uchun, O‘zbekistonda 2020-yilda axborot texnologiyalari sohasida 106 ta jinoyat qayd etilgan. 2021-yilda bu ko‘rsatkich 2 281 tani, 2022-yilda esa bir yil avvalgidan ikki baravar, 2 yil avvalgidan 40 baravar ko‘payib, 4 332 tani tashkil etgan. Yil davomida qayd etilgan holatlarning 3 372 tasi yoki 82 foizini bank plastik kartalardan pul mablag‘larni talon-toroj qilish bilan bog‘liq jinoyatlardir.
Avvalroq Toshkentda yashovchi o‘smir 17 nafar buxorolikning plastik kartochkasidagi pullarni o‘g‘irlagani, Farg‘onalik fuqaroni aldab, plastik kartasidagi pullarini yechib olgan soxta xaridor ushlangani, Andijonda 8-sinf o‘quvchisi o‘nlab fuqarolarning pullarini qo‘lga kiritib, PUBG o‘yiniga tikib yuborgani to‘g‘risida xabar berilgandi.
Izoh (0)