Toshkent shahri Bektemir tumanida 2022-yil 1-noyabr kuni xotinini pichoqlab o‘ldirgan erkak qamaldi. Bu haqda “UzReport” xabar berdi.
Qayd etilishicha, muntazam janjallar tufayli ayol ota-onasining uyiga ketib qolgan. Erkak xotinining telefonidagi begona raqamlardan shubhalanib, u bilan gaplashish maqsadida qaynatasining uyiga borgan.
Shu paytda qo‘lidagi oshxona pichog‘i bilan ayolni pichoqlagan. Shundan so‘ng erkak sodir etgan jinoyatini tan olish maqsadida ichki ishlarga murojaat qilgan. Ayol esa olgan tan jarohatlari oqibatida vafot etgan.
Sudlanuvchi Jinoyat kodeksining 97-moddasi 1-qismida nazarda tutilgan jinoyatni sodir etganlikda aybli deb topilgan va unga 10 yil ozodlikdan mahrum qilish jazosi tayinlangan. Shu bilan birga, Bektemir tumani ichki ishlar bo‘limi boshlig‘i nomiga xususiy ajrim chiqarilgan.
Izoh (0)