Andijonda 8-sinf o‘quvchisi o‘nlab fuqarolarning pullarini qo‘lga kiritib, PUBG o‘yiniga tikib yuborgani aniqlandi

Farg‘onalik fuqaroni aldab, pullarini qo‘lga kiritgan 8-sinf o‘quvchisi aniqlandi. Bu haqda Postda xabar qildi.

Qayd etilishicha, Farg‘ona viloyatida yashovchi D.I. (1991-yilda tug‘ilgan) ichki ishlar organiga ariza bilan murojaat qilib, firibgar tomonidan pullaridan ayrilganini ma’lum qilgan. Jabrlanuvchining bildirishicha, noma’lum shaxs Telegram messenjeri orqali unga “Omad shou” dasturida pul yutug‘ini yutib olgani to‘g‘risida xabar yuborgan. Uning ishonchiga kirib, yutuq pullarini bank plastik kartasiga o‘tkazib berishini aytgan. O‘z navbatida fuqaro unga o‘z plastik raqami ma’lumotlarini bergan. Biroz o‘tib plastik kartasidagi bir million so‘mga yaqin pullar yechib olingan.

Olib borilgan tezkor-qidiruv tadbirlari davomida ushbu jinoyatni Andijon viloyatida yashovchi 8-sinf o‘quvchisi O.X. (2007-yilda tug‘ilgan) sodir etgani aniqlanib, qo‘lga olingan. O‘rganishlar natijasida O.X. shu usul bilan o‘nlab fuqaroni aldab, pullarini qo‘lga kiritgani, jinoiy yo‘l bilan topgan pullarni esa PUBG onlayn o‘yiniga tikib, sarflaganligi ma’lum bo‘lgan.

Holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari olib borilgan.