Buxoroda mobil ilova orqali fuqaroning plastik kartasidan pul yechib olish jinoyatini sodir etgan shaxs — toshkentlik 14 yoshli o‘smir ekani ma’lum bo‘ldi. Tergov harakatlari davomida o‘smirning yana 16 nafar fuqaroni chuv tushirgani ochiqlandi, deya xabar bermoqda “Daryo” muxbiri.
Buxoro shahrida yashovchi 51 yoshli fuqaro M.N. shahar IIBga murojaat qilib, plastik kartochkasidagi 3 million 150 ming so‘m pul noma’lum shaxs tomonidan yechib olinganini bildirgan. Mazkur kiberjinoyat IIB xodimlari tomonidan 28 kunda fosh etildi.
“Men pulimning qaytarilishidan umidimni uzgan edim. Biroq oradan 28 kun o‘tgach, Buxoro shahar IIB jinoyat qidiruv bo‘limidan qo‘ng‘iroq qilib, plastik kartamdan pul yechib olgan fuqaro topilgani va pullar bir necha kun ichida qaytarilishini bildirishdi. To‘g‘risi, oradagi qariyb bir oycha jimlikdan IIBdan ham ishonchimni yo‘qotgan edim”, — deydi fuqaro M.N.
Fuqaroning plastik kartasidagi pullarni yechib olgan shaxs — toshkentlik 14 yoshli rus millatiga mansub K.N. ekani aniqlangan. Holat yuzasidan olib borilgan tezkor, texnik va tergov harakatlari jarayonida o‘smir yana 16 nafar buxorolik fuqaroning plastik kartasidagi pullarni kiber usulda yechib olib, o‘z ota-onasining plastik kartasiga o‘tkazib kelgani fosh etilgan.
“2022-yilning olti oyi davomida fuqarolarning plastik kartasidan pul yechib olish bilan bog‘liq 68 ta jinoyat, jumladan, 36 ta o‘g‘rilik, 32 ta firibgarlik sodir etilgan. 58 ta holatda jinoyat ochiqlangan. Fosh etilmagan 10 ta holat bo‘yicha tezkor, texnik va tergov harakatlari davom etmoqda. 14 yoshli bolaning xatti-harakatlari yuzasidan tergov harakatlari olib borilmoqda”, — deydi viloyat IIB axborot xizmati rahbari Shuhrat Jalolov.
Izoh (0)