Ўзбекистонда аҳолининг кибержиноятлардан хабардорлигини оширишга қаратилган инновацион танловлар ташкил этилади. Бу ҳақда ИИВ Киберхавфсизлик маркази хабар берди.
Қайд этилишича, сўнгги йиллардаги ахборот коммуникация технологияларидан фойдаланиб содир этилган жиноятларнинг ўсиш тенденцияси сақланиб қолмоқда. Шу боис Тошкентнинг Олмазор, Чилонзор ва Юнусобод туманларида банк карталари билан боғлиқ жиноятларнинг олдини олиш ва аҳоли орасида “рақамли иммунитет”ни шакллантириш мақсадида Cyber 10 day комплекс тарғибот тадбирларга старт берилган.
Cyber 10 day комплекс тарғибот-ташвиқот тадбирлари “маҳаллабай”, “хонадонбай” ва “фуқаробай” шаклидаги аҳолининг ҳар бир қатлами ўртасида индивидуал ёндашув асосида олиб борилади. Тадбир давомида, корхона, ташкилот, муассасалар ва таълим муассасалари, шунингдек, бозорлар, савдо комплекслари ва жамоат жойлари ҳам қамраб олинади. Тадбирларини янада қизғин тус олдириш мақсадида таниқли санъаткорлар жалб этилади.
Уларга банк карта бошқарувини тасдиқловчи кодни ошкор этиш орқали пул маблағлари талон-торож қилиниши ҳамда глобал тармоқ орқали содир этилаётган бошқа жиноятларнинг оғир оқибатлари хусусида тушунтириш ишлари олиб борилади.
Тадбирлар давомида кибержиноятларга қарши курашишни тарғиб қилувчи ҳамда кибержиноятлардан огоҳ бўлишга қаратилган 10 дан ортиқ инновацион ёндашув асосида танловлар ўтказилиши режалаштирилган. Жумладан:
- маҳаллалар ўртасида “Энг яхши маҳалла”;
- катта ёшдаги аҳоли вакиллари, нафақахўрлар иштирокида “Банк картаси кодини ҳеч кимга бермайман” номли;
- блогерлар ўртасида “Энг яхши контент”;
- таълим муассасаларидаги ёшлар, ижодий фаолият билан шуғулланувчи аҳоли ўртасида “Энг яхши монолог”, “Энг яхши иншо”, “Энг яхши шеър” танловлари;
- 30 ёшгача бўлган ёшлар ўртасида “Киберхавфсизлик билимдонлари” интеллектуал ўйинлари шулар жумласидандир.
Комплекс тарғибот-ташвиқот тадбирлари 2023 йилнинг 1 март кунига қадар давом этиб, танловларда фаол иштирок этган ғолиб ва совриндорларни тақдирлаш тадбирлари Ёшлар ижод саройида ўтказилиши белгиланган.
Маълумот учун, Ўзбекистонда 2020 йилда ахборот технологиялари соҳасида 106 та жиноят қайд этилган. 2021 йилда бу кўрсаткич 2 281 тани, 2022 йилда эса бир йил аввалгидан икки баравар, 2 йил аввалгидан 40 баравар кўпайиб, 4 332 тани ташкил этган. Йил давомида қайд этилган ҳолатларнинг 3 372 таси ёки 82 фоизини банк пластик карталардан пул маблағларни талон-торож қилиш билан боғлиқ жиноятлардир.
Аввалроқ Тошкентда яшовчи ўсмир 17 нафар бухороликнинг пластик карточкасидаги пулларни ўғирлагани, Фарғоналик фуқарони алдаб, пластик картасидаги пулларини ечиб олган сохта харидор ушлангани, Андижонда 8-синф ўқувчиси ўнлаб фуқароларнинг пулларини қўлга киритиб, PUBG ўйинига тикиб юборгани тўғрисида хабар берилганди.
Изоҳ (0)