20-fevral kuni Toshkent shahar Ichki ishlar bosh boshqarmasida “Axborot-texnologiyalari sohasidagi jinoyatlarning turlari va himoyalanish usullari” mavzusida brifing o‘tkazildi. Bu haqda tadbirda ishtirok etgan “Daryo” muxbiri xabar bermoqda.
Brifingda aytilishicha, O‘zbekistonda 2020-yilda axborot texnologiyalari sohasida 106 ta jinoyat qayd etilgan. 2021-yilda bu ko‘rsatkich 2 281 tani, 2022-yilda esa bir yil avvalgidan ikki baravar, 2 yil avvalgidan 40 baravar ko‘payib, 4 332 tani tashkil etgan.
2022-yilda axborot texnologiyalari sohasida ro‘yxatga olingan jinoyatlarning:
- 2 747 tasi kibero‘g‘rilik;
- 625 tasi kiberfiribgarlik;
- 874 tasi giyohvandlik jinoyatlari hisoblanadi.
Ta’kidlanishicha, yil davomida qayd etilgan holatlarning 3 372 tasi yoki 82 foizini bank plastik kartalardan pul mablag‘larni talon-toroj qilish bilan bog‘liq jinoyatlar tashkil etgan.
IIBB mas’ullarining qo‘shimcha qilishicha, aholi bilan olib borilgan profilaktik chora-tadbirlarga qaramasdan, bu turdagi jinoyatlarning salmog‘i yuqoriligicha qolmoqda.
“Aholimiz hanuzgacha buni tushunib yetganicha yo‘q”, — deydi boshqarma matbuot xizmati rahbari Nilufar Isaxanova.
Izoh (0)