O‘zbekistondan Afg‘onistonga temiryo‘l qatnovi 1-fevraldan boshlab vaqtincha to‘xtatilgandi. “O‘zbekiston temir yo‘llari” holat yuzasidan qo‘shimcha ma’lumot berdi.
Qayd etilishicha, Afg‘oniston temiryo‘llari boshqarmasi rahbari yangi shartnoma shartlarini yangidan sharhlagan va bunda kelishilgan xizmat qiymatlarini boshqacha talqin qilgan.
Ta’kidlanishicha, bu holat tushunarsiz vaziyatni yuzaga keltirmoqda. Afg‘oniston tomonidan Hayraton stansiyasida amalga oshirilishi lozim bo‘lgan texnik ishlar belgilangan muddatda bajarilmagani to‘g‘risida hech qanday tushuntirish berilmayapti.
Hayraton stansiyasiga yetkazib berilgan vagonlarni bo‘shatish va qaytarish ishlarini tashkil etish uchun Afg‘oniston temir yo‘l boshqarmasi “Mansor Fateh” kompaniyasini bilan shartnoma imzolagani to‘g‘risida ma’lumot tarqatilgan. Ushbu tashkilot stansiyada kelishilgan muddatda ishlarni tashkillashtirishga ulgurmagan.
Bundan tashqari “Sogdiana trans” SHK tomonidan tadbirkorlar bilan uchrashuvlar o‘tkazilib, ularni qo‘llab-quvvatlash maqsadida vaqtinchalik avtomobil transporti orqali yuklar tashuvini tashkillashtirishda yordam berilishiga qaramay, qo‘shni davlat tomoni tadbirkorlarga yuklarni avtomobil transporti orqali tashimaslik to‘g‘risida tavsiya berayotgani haqida ma’lumotlar kelmoqda.
Shu bilan birga, Afg‘oniston temir yo‘l boshqarmasi rahbariyatining iltimosiga ko‘ra keyingi hafta boshida Termiz shahrida temiryo‘l orqali yuklarni tashishni tashkil etish, Hayraton stansiyasiga yetkazib berish va olib chiqishni tashkil etish bo‘yicha “Sogdiana trans” bilan yangi shartnoma imzolanishi rejalashtirilmoqda.
Izoh (0)