Sogʻliqni saqlash vazirining ijtimoiy tarmoqlarda eʼlon qilingan telefon raqamiga kuniga 500 dan ortiq murojaatlar kelib tushmoqda. Bu haqda Amrullo Inoyatov Namanganda boʻlib oʻtgan matbuot anjumani davomida maʼlum qildi, deya xabar beradi “Daryo” muxbiri Azizbek Abduvaliyev.
“Koʻpchilik ushbu raqamga qoʻngʻiroq qilganimizda oʻzi emas, yordamchisi yoki haydovchisi olyapti deb nolibdi. Toʻgʻri tushunish kerak, koʻpincha kun davomida 3-4 ta majlisda ishtirok etamiz yoki oʻzimiz oʻtkazamiz. Bu payt, tabiiyki, telefon oʻzimda boʻlmaydi. Biroq bu telefonga yuborilgan murojaatlar eʼtiborsiz qoladi, degani emas. Tizim, undagi ayrim rahbarlar haqida shunday maʼlumotlar kelyaptiki... Ishga qabul qilishdagi taʼmagirliklar, tanish-bilishchilik holatlari va hokazo. Birinchi chorak yakuni boʻyicha bularning muhokamasi va amaliy natijalari boʻladi hali. Kim boʻlishi va qanday xizmat koʻrsatib qoʻyganidan qatʼiy nazar, keskin choralar koʻramiz”, — dedi Amrullo Inoyatov.
Vazir Namanganda 2022-yil davomida sogʻliqni saqlash tizimida 22 ta holatda jinoyat qayd etilgani, qonunbuzilishlarning eng katta qismi pora evaziga ishga joylashtirishga toʻgʻri kelishini bildirdi. Shuningdek, viloyatdagi tibbiyot xodimlari faoliyatidan norozi boʻlib 50 dan ortiq murojaat yoʻllangan.
Izoh (0)