Sogʻliqni saqlash vaziri: Taʼlimda oʻzgarish qilmas ekanmiz, tibbiyot ham oʻzgarmaydi

Tibbiyotdagi oʻzgarishlar taʼlim tizimi bilan bevosita bogʻliq. Bu haqda Sogʻliqni saqlash vaziri Amrullo Inoyatov Namanganda boʻlib oʻtgan matbuot anjumani davomida maʼlum qildi, deya xabar beradi “Daryo” muxbiri Azizbek Abduvaliyev.

“Taʼlimda oʻzgarish qilmas ekanmiz, tibbiyot ham oʻzgarmaydi. Buni 20 yil davomida tibbiy taʼlim sohasida ishlagan mutaxassis sifatida aytyapman. Dunyoda hamshiralikning oʻzini 50 dan ortiq yoʻnalishi bor. Tor yoʻnalishlar, qoʻshma taʼlim dasturlariga eʼtibor qaratishimiz zarur. Xususan, radiologiya, biotexnologiya kabi yigirmaga yaqin sohada bakalavriat yoʻnalishlari bizda hali-hanuz mavjud emas”, — dedi Amrullo Inoyatov.

Matbuot anjumani davomida namanganlik jurnalistlar tibbiy taʼlim muassasalarida oʻqish istagida boʻlgan, biroq bunga imkoniyati yoʻl bermayotgan yoshlarning tahsil olishlariga koʻmaklashish uchun vazirning nechogʻli vakolatli ekanligi bilan qiziqdi. Inoyatov hududda shifokor va hamshiralarga boʻlgan ehtiyojdan kelib chiqib, bu masalada amaliy yordam koʻrsatishga tayyor ekanligini bildirdi.