Афғонистон Ҳайратон станцияси бўйича тушунтириш бермаётгани маълум қилинди

Ўзбекистондан Афғонистонга темирйўл қатнови 1 февралдан бошлаб вақтинча тўхтатилганди. “Ўзбекистон темир йўллари” ҳолат юзасидан қўшимча маълумот берди.

Қайд этилишича, Афғонистон темирйўллари бошқармаси раҳбари янги шартнома шартларини янгидан шарҳлаган ва бунда келишилган хизмат қийматларини бошқача талқин қилган.

Таъкидланишича, бу ҳолат тушунарсиз вазиятни юзага келтирмоқда. Афғонистон томонидан Ҳайратон станциясида амалга оширилиши лозим бўлган техник ишлар белгиланган муддатда бажарилмагани тўғрисида ҳеч қандай тушунтириш берилмаяпти.

Ҳайратон станциясига етказиб берилган вагонларни бўшатиш ва қайтариш ишларини ташкил этиш учун Афғонистон темир йўл бошқармаси “Мансор Фатеҳ” компаниясини билан шартнома имзолагани тўғрисида маълумот тарқатилган. Ушбу ташкилот станцияда келишилган муддатда ишларни ташкиллаштиришга улгурмаган.

Бундан ташқари “Согдиана транс” ШК томонидан тадбиркорлар билан учрашувлар ўтказилиб, уларни қўллаб-қувватлаш мақсадида вақтинчалик автомобиль транспорти орқали юклар ташувини ташкиллаштиришда ёрдам берилишига қарамай, қўшни давлат томони тадбиркорларга юкларни автомобиль транспорти орқали ташимаслик тўғрисида тавсия бераётгани ҳақида маълумотлар келмоқда.

Шу билан бирга, Афғонистон темир йўл бошқармаси раҳбариятининг илтимосига кўра кейинги ҳафта бошида Термиз шаҳрида темирйўл орқали юкларни ташишни ташкил этиш, Ҳайратон станциясига етказиб бериш ва олиб чиқишни ташкил этиш бўйича “Согдиана транс” билан янги шартнома имзоланиши режалаштирилмоқда.