Belarus hududida Rossiya va Belarusning mintaqaviy qo‘shin guruhlari tarkibiga kiruvchi harbiy aviatsiyasi bo‘linmalarining qo‘shma o‘quv mashqlari boshlandi, deb xabar bermoqda Belarus Mudofaa vazirligi.
Mashg‘ulotlar Belarus harbiy-havo kuchlari va havo hujumiga qarshi mudofaa qo‘shinlari aerodromlarida va poligonlarida 16-yanvardan 1-fevralga qadar bo‘lib o‘tadi. Rossiya tomonidan ushbu tadbirlarda mamlakat havo-kosmik kuchlari jangovar guruhlari qatnashmoqda.
O‘quv mashqlarining asosiy maqsadi — “o‘quv-jangovar vazifalarni qo‘shma ravishda bajarish chog‘ida tezkor muvofiqlikni oshirish”, deyiladi Belarus Mudofaa vazirligi xabarida.
Idora aniqlik kiritishicha, mashg‘ulotlar chog‘ida qo‘shinlar chegara bo‘ylab havo hududida patrullik qiladi va qo‘shinlar guruhlarini havodan qo‘llab-quvvatlaydi.
Rossiya-Belarus harbiy hamkorligi
Rossiya va Belarus Ittifoq davlati 2000-yil yanvaridan buyon mavjud bo‘lib kelmoqda. Ittifoq ishtirokchilari umumiy parlament va konstitutsiya, yagona valyuta yaratishni muhokama qilgan, ammo bunday bitimni qabul qilmagan. 2019-yilda Rossiya tashabbusi bilan muzokaralar qayta boshlandi, 2021-yilda esa tomonlar Rossiya va Belarusning integratsiyalashuviga qaratilgan 28 ta ittifoq dasturlarni kelishib oldi.
2022-yil 10-oktabr kuni Belarus prezidenti Aleksandr Lukashenko rossiyalik hamkasbi Vladimir Putin bilan “Ittifoq davlati g‘arbiy chegaralaridagi keskinlik sababli” mintaqaviy qo‘shinlar guruhini kuchaytirish haqida kelishib olganini ma’lum qildi.
15-oktabr kuni esa mintaqaviy qo‘shin guruhlarining rossiyalik harbiylardan iborat dastlabki eshelonlari Belarusga yetib keldi. Keyinroq esa to‘qqiz mingga yaqin Rossiya harbiylari qo‘shma qo‘shinlar guruhini joylashtirish doirasida Belarusga yetib kelishi ma’lum qilindi.
Ayni paytda esa Rossiya va Belarus mintaqaviy qo‘shinlar guruhini kuchaytirishda davom etmoqda, Belarusga Rossiyadan yangi kuchlar va harbiy texnika yetib kelmoqda.
Nima uchun bu xavotir uyg‘otmoqda?
Rossiya va Belarus o‘quv mashqlari Minsk Rossiyaning Ukrainadagi yangi hujumlarida qatnashishi mumkinligi haqidagi xavotirlar fonida e’tiborni tortmoqda.
Rossiya Belarus hududida doimiy harbiy baza yaratishga intilmoqda va Belarus hukumatini Ukrainadagi hujum harakatlarini qo‘llab-quvvatlashga majburlashga urinib, “axborot kampaniyalari”ni olib bormoqda, deb hisoblaydi Amerikaning urushni tadqiq qilish instituti ekspertlari. Biroq ular taxmin qilishicha, yaqin kelajakda Belarusning Ukrainaga bostirib kirishi “mamlakat ichkarisidagi ichki dinamika tufayli” dargumon.
Belarusda Rossiyaning katta sonli qo‘shinlari bo‘lishiga qaramasdan, ular asosan o‘quv mashg‘ulotlarida qatnashmoqda, degan edi Buyuk Britaniya razvedkasi. Bu qo‘shinlar yangi hujumga jalb etilishi ehtimoli past, deyilgandi idora xabarida.
Izoh (0)