15-yanvar kuni Germaniyada AQSH qurolli kuchlari Ukraina harbiylarini o‘qitish bo‘yicha kengaytirilgan jangovar mashg‘ulotlarni boshladi. Bu haqda AQSH shtab boshliqlari birlashgan qo‘mitasi raisi Mark Milli ma’lum qildi, deb xabar bermoqda Associated Press.
“AQSH harbiylari tomonidan yakshanba kuni Germaniyada Ukraina qo‘shinlari uchun yangi kengaytirilgan jangovar mashg‘ulotlar boshlandi”, — deb yozadi agentlik Millining bayonotiga tayanib.
Unga ko‘ra, mashg‘ulotlarda Ukrainadan kelgan 500 ga yaqin harbiy xizmatchi o‘qitiladi.
Bundan tashqari, Associated Press xabariga ko‘ra, Milli 16-yanvar kuni Grafenverdagi (Bavariya federal shtati) mashg‘ulotlar maydoniga tashrif buyurishni va mashg‘ulotlar dasturi bilan shaxsan tanishishni rejalashtirgan.
Avvalroq Pentagon Ukraina harbiylarini o‘qitish mobaynida ularni AQSHning Bradley piyodalar jangovar mashinasi bilan ishlashga o‘rgatish rejalashtirilgani haqida ma’lum qilgandi. AQSH o‘quv mashg‘ulotlarni “oylar emas, haftalar ichida” yakunlashni maqsad qilgan.
Yevropa Ittifoqi 2022-yil oxirida mintaqada keskinlik kuchaygan bir paytda Ukraina harbiylari uchun harbiy tayyorgarlik missiyasini yaratish imkoniyatini ko‘rib chiqa boshlagandi. Die Welt nashrining yozishicha, YI rahbariyati buni Ukraina chegaralari yaqinida va Qrimda “Rossiya harbiy faoliyati davom etayotganini” hisobga olib, Ukraina bilan birdamlik ifodasi sifatida izohlamoqda. Harbiy o‘qitish missiyasining yaratilishini Litva, Latviya, Estoniya, Polsha, Ruminiya va Slovakiya talab qilgan. Ular Shvetsiya va Finlyandiya tomonidan qo‘llab-quvvatlangan.
Izoh (0)