Belarusga Rossiyadan yangi kuchlar yetib keldi

Rossiya va Belarus mintaqaviy qo‘shinlar guruhini kuchaytirishda davom etmoqda, Belarusga Rossiyadan yangi kuchlar va harbiy texnika yetib kelmoqda, deya ma’lum qildi respublika Mudofaa vazirligi.

“Bugungi kunda, yuzaga kelayotgan vaziyatdan kelib chiqib, bu jarayon bosqichma-bosqich amalga oshirilmoqda”, — deyishdi Minskdagilar.

Yetib kelayotgan Rossiya harbiylari ishtirokida Belarus poligonlarida jangovar moslashuv tashkil etilmoqda. “Bundan tashqari, Belarus Respublikasi va Rossiya Federatsiyasi Qurolli kuchlari aviatsiya bo‘linmalari jangovar tayyorgarlik darajasini oshirish maqsadida qo‘shma parvoz-taktik o‘quv mashqlarini o‘tkazish rejalashtirlmoqda”, — deyiladi xabarda.

Avvalroq Belarusning Ukraina bilan chegarasida Rossiya 10 mingga yaqin harbiy yig‘gani, Belarus har qanday vaqtda Rossiyaga Ukrainaga shimoldan hujum qilish imkoniyatini berishga tayyorligi ma’lum qilingandi.

Rossiya va Belarus Ittifoq davlati 2000-yil yanvaridan buyon mavjud bo‘lib kelmoqda. Ittifoq ishtirokchilari umumiy parlament va konstitutsiya, yagona valyuta yaratishni muhokama qilgan, ammo bunday bitimni qabul qilmagan. 2019-yilda Rossiya tashabbusi bilan muzokaralar qayta boshlandi, 2021-yilda esa tomonlar Rossiya va Belarusning integratsiyalashuviga qaratilgan 28 ta ittifoq dasturlarni kelishib oldi.

10-oktabr kuni Belarus prezidenti Aleksandr Lukashenko rossiyalik hamkasbi Vladimir Putin bilan “Ittifoq davlati g‘arbiy chegaralaridagi keskinlik sababli” mintaqaviy qo‘shinlar guruhini kuchaytirish haqida kelishib olganini ma’lum qildi.

15-oktabr kuni esa mintaqaviy qo‘shin guruhlarining rossiyalik harbiylardan iborat dastlabki eshelonlari Belarusga yetib keldi. Keyinroq esa to‘qqiz mingga yaqin Rossiya harbiylari qo‘shma qo‘shinlar guruhini joylashtirish doirasida Belarusga yetib kelishi ma’lum qilindi.