Беларусь ҳудудида Россия ва Беларуснинг минтақавий қўшин гуруҳлари таркибига кирувчи ҳарбий авиацияси бўлинмаларининг қўшма ўқув машқлари бошланди, деб хабар бермоқда Беларусь Мудофаа вазирлиги.
Машғулотлар Беларусь ҳарбий-ҳаво кучлари ва ҳаво ҳужумига қарши мудофаа қўшинлари аэродромларида ва полигонларида 16 январдан 1-февралга қадар бўлиб ўтади. Россия томонидан ушбу тадбирларда мамлакат ҳаво-космик кучлари жанговар гуруҳлари қатнашмоқда.
Ўқув машқларининг асосий мақсади — «ўқув-жанговар вазифаларни қўшма равишда бажариш чоғида тезкор мувофиқликни ошириш», дейилади Беларусь Мудофаа вазирлиги хабарида.
Идора аниқлик киритишича, машғулотлар чоғида қўшинлар чегара бўйлаб ҳаво ҳудудида патруллик қилади ва қўшинлар гуруҳларини ҳаводан қўллаб-қувватлайди.
Россия-Беларусь ҳарбий ҳамкорлиги
Россия ва Беларусь Иттифоқ давлати 2000 йил январидан буён мавжуд бўлиб келмоқда. Иттифоқ иштирокчилари умумий парламент ва конституция, ягона валюта яратишни муҳокама қилган, аммо бундай битимни қабул қилмаган. 2019 йилда Россия ташаббуси билан музокаралар қайта бошланди, 2021 йилда эса томонлар Россия ва Беларуснинг интеграциялашувига қаратилган 28 та иттифоқ дастурларни келишиб олди.
2022 йил 10 октябрь куни Беларусь президенти Александр Лукашенко россиялик ҳамкасби Владимир Путин билан «Иттифоқ давлати ғарбий чегараларидаги кескинлик сабабли» минтақавий қўшинлар гуруҳини кучайтириш ҳақида келишиб олганини маълум қилди.
15 октябрь куни эса минтақавий қўшин гуруҳларининг россиялик ҳарбийлардан иборат дастлабки эшелонлари Беларусга етиб келди. Кейинроқ эса тўққиз мингга яқин Россия ҳарбийлари қўшма қўшинлар гуруҳини жойлаштириш доирасида Беларусга етиб келиши маълум қилинди.
Айни пайтда эса Россия ва Беларусь минтақавий қўшинлар гуруҳини кучайтиришда давом этмоқда, Беларусга Россиядан янги кучлар ва ҳарбий техника етиб келмоқда.
Нима учун бу хавотир уйғотмоқда?
Россия ва Беларусь ўқув машқлари Минск Россиянинг Украинадаги янги ҳужумларида қатнашиши мумкинлиги ҳақидаги хавотирлар фонида эътиборни тортмоқда.
Россия Беларусь ҳудудида доимий ҳарбий база яратишга интилмоқда ва Беларусь ҳукуматини Украинадаги ҳужум ҳаракатларини қўллаб-қувватлашга мажбурлашга уриниб, «ахборот кампаниялари»ни олиб бормоқда, деб ҳисоблайди Американинг урушни тадқиқ қилиш институти экспертлари. Бироқ улар тахмин қилишича, яқин келажакда Беларуснинг Украинага бостириб кириши «мамлакат ичкарисидаги ички динамика туфайли» даргумон.
Беларусда Россиянинг катта сонли қўшинлари бўлишига қарамасдан, улар асосан ўқув машғулотларида қатнашмоқда, деган эди Буюк Британия разведкаси. Бу қўшинлар янги ҳужумга жалб этилиши эҳтимоли паст, дейилганди идора хабарида.
Изоҳ (0)