Shvetsiya Kurdiston ishchilar partiyasi (KIP, Anqarada terrorchi deb tan olingan) tarafdorlarini Turkiyaga ekstraditsiya qilmayapti va ularning aksiyalariga qarshilik ko‘rsatmayapti, bu Anqara va Stokgolm o‘rtasidagi munosabatlarni yomonlashtirishi mumkin, dedi Turkiya yetakchisi Rajab Toyyib Erdo‘g‘on.
Davlat rahbari 130 ga yaqin “terrorchi”ning ekstraditsiya qilinishi Turkiya tomonidan Shvetsiya va Finlyandiyaning NATOga a’zo bo‘lish arizasi qo‘llab-quvvatlanishi uchun zaruriy shart ekanini eslatdi. “Bu shart hali bajarilmadi”, — dedi Erdo‘g‘on.
Shuningdek, u Stokgolmda KIP tarafdorlarining aksiyalari o‘tkazilayotganini, Anqara buni nomaqbul deb hisoblashini aytdi. Turkiya rahbarining so‘zlariga ko‘ra, “ogohlantirishlar”ga qaramay, Shvetsiya bunday namoyishlarga to‘sqinlik qilmayapti.
“Agar ular ushbu vaziyat bo‘yicha chora ko‘rmasa, bu Shvetsiya bilan munosabatlarimizdagi keskinlikning yanada oshishiga olib kelishi mumkin”, — deya so‘zini yakunladi Erdo‘g‘on.
2022-yil 18-may kuni Finlyandiya va Shvetsiya NATOga a’zo bo‘lish uchun ariza bergan edi. Bir oy o‘tgach, ular alyansga a’zo bo‘lish e’tirozini bartaraf etish uchun Turkiya bilan uch tomonlama shartnoma imzoladi.
Ikki davlatning NATOga a’zoligi Turkiya va Vengriyaning roziligiga bog‘liq. Anqara Stokgolmdan terrorchilar, jumladan, kurdlar va FETO a’zolarini ekstraditsiya qilishni talab qilmoqda. Shvetsiya va Finlyandiya parlamentlari spikerlari yanvar oyida Turkiya bilan NATOga a’zolikni muhokama qilishni rejalashtirmoqda.
Izoh (0)