Rossiya Vladimir Zelenskiy tomonidan e’lon qilingan, Ukrainada vaziyatni tinch yo‘l bilan tartibga solish bo‘yicha rejaning Turkiya tomonidan qo‘llab-quvvatlanishini nomaqbul deb hisoblaydi. Bu haqda Rossiya Tashqi ishlar vazirligi vakili Mariya Zaxarova ma’lum qildi, deb yozadi “Kommersant”.
“Kiyev rejimining bu o‘yini Anqara tomonidan qo‘llab-quvvatlanishi Ukraina tinchlikka erishishning optimal yo‘llarini topishga yordam berishi dargumon”, — dedi Zaxarova brifingda.
10-yanvar kuni Turkiya tashqi ishlar vaziri Mavlud Chavusho‘g‘li Anqara Ukraina prezidenti Vladimir Zelenskiyning tinchlik formulasini qo‘llab-quvvatlashini ma’lum qilgan edi.
Turkiya mudofaa vaziri Xulusi Akar esa Ukraina mudofaa vaziri Aleksey Reznikov bilan qo‘ng‘iroqlashib, zudlik bilan o‘t ochishni to‘xtatish va tinchlikni qayta tiklashga chaqirdi.
Vazir Turkiya Rossiya-Ukraina nizosini tinch yo‘l bilan tartibga solishda yordamlashishni va “barcha darajalarda” gumanitar ko‘mak ko‘rsatishda davom etishini va’da qildi.
Noyabr o‘rtalarida Zelenskiy G20 sammitida videomurojaat bilan chiqib, o‘zining o‘nta shartdan iborat bo‘lgan “tinchlik formulasi”ni taklif etgan edi. Ushbu shartlar radiatsiyaviy va yadroviy xavfsizlik; oziq-ovqat xavfsizligi; energetika xavfsizligi; barcha asirlar va deportatsiya qilinganlarning ozod etilishi; BMT ustavining bajarilishi hamda Ukraina hududiy yaxlitligi va dunyo tartibining qayta tiklanishi; Rossiya qo‘shinlarining olib ketilishi va jangovar harakatlarning to‘xtatilishi; adolatning qaytarilishi; ekotsid (flora va faunaning yo‘q qilinishi)ga qarshi kurash; eskalatsiyaga yo‘l qo‘ymaslik; nizo yakunlanganining mustahkamlanishini o‘z ichiga oladi.
Ammo Rossiya hukumati Kiyev bilan Ukraina prezidenti Vladimir Zelenskiy tomonidan taklif qilingan “tinchlik formulasi” nizomlari asosida muloqot olib bormoqchi emas. Ukraina rahbariyatining tinchlik bo‘yicha rejasi konsepsiyasini Rossiya tashqi ishlar vaziri Sergey Lavrov xomxayol deb tavsifladi.
Mavzuga doir:
Izoh (0)