Россия Владимир Зеленский томонидан эълон қилинган, Украинада вазиятни тинч йўл билан тартибга солиш бўйича режанинг Туркия томонидан қўллаб-қувватланишини номақбул деб ҳисоблайди. Бу ҳақда Россия Ташқи ишлар вазирлиги вакили Мария Захарова маълум қилди, деб ёзади «Коммерсантъ».
«Киев режимининг бу ўйини Анқара томонидан қўллаб-қувватланиши Украина тинчликка эришишнинг оптимал йўлларини топишга ёрдам бериши даргумон», — деди Захарова брифингда.
10 январь куни Туркия ташқи ишлар вазири Мавлуд Чавушўғли Анқара Украина президенти Владимир Зеленскийнинг тинчлик формуласини қўллаб-қувватлашини маълум қилган эди.
Туркия мудофаа вазири Хулуси Акар эса Украина мудофаа вазири Алексей Резников билан қўнғироқлашиб, зудлик билан ўт очишни тўхтатиш ва тинчликни қайта тиклашга чақирди.
Вазир Туркия Россия-Украина низосини тинч йўл билан тартибга солишда ёрдамлашишни ва «барча даражаларда» гуманитар кўмак кўрсатишда давом этишини ваъда қилди.
Ноябрь ўрталарида Зеленский G20 саммитида видеомурожаат билан чиқиб, ўзининг ўнта шартдан иборат бўлган «тинчлик формуласи»ни таклиф этган эди. Ушбу шартлар радиациявий ва ядровий хавфсизлик; озиқ-овқат хавфсизлиги; энергетика хавфсизлиги; барча асирлар ва депортация қилинганларнинг озод этилиши; БМТ уставининг бажарилиши ҳамда Украина ҳудудий яхлитлиги ва дунё тартибининг қайта тикланиши; Россия қўшинларининг олиб кетилиши ва жанговар ҳаракатларнинг тўхтатилиши; адолатнинг қайтарилиши; экоцид (флора ва фаунанинг йўқ қилиниши)га қарши кураш; эскалацияга йўл қўймаслик; низо якунланганининг мустаҳкамланишини ўз ичига олади.
Аммо Россия ҳукумати Киев билан Украина президенти Владимир Зеленский томонидан таклиф қилинган «тинчлик формуласи» низомлари асосида мулоқот олиб бормоқчи эмас. Украина раҳбариятининг тинчлик бўйича режаси концепциясини Россия ташқи ишлар вазири Сергей Лавров хомхаёл деб тавсифлади.
Изоҳ (0)