Rossiya hukumati Kiyev bilan Ukraina prezidenti Vladimir Zelenskiy tomonidan taklif qilingan “tinchlik formulasi” nizomlari asosida muloqot olib bormoqchi emas. Ukraina rahbariyatining tinchlik bo‘yicha rejasi konsepsiyasini Rossiya tashqi ishlar vaziri Sergey Lavrov xomxayol deb tavsifladi.
“Turli xil g‘oyalar va ‘tinchlik formulalari’ni ilgari surish orqali Zelenskiy G‘arbning yordami bilan qo‘shinlarimizning Donbass, Qrim, Zaporojye va Xerson kabi Rossiya hududlaridan olib ketilishiga, Rossiya tomonidan tovon to‘lanishiga va boshqa narsalarga umidvor bo‘lmoqda. Albatta, biz bunday shartlarda hech kim bilan muzokara olib bormaymiz”, — deya xulosa qildi TIV rahbari “RIA Novosti”ga bergan intervyusida.
Sergey Lavrov, shuningdek, Vladimir Zelenskiyni fevralda boshlangan Rossiya-Ukraina muzokaralar jarayonini “anglosakslar buyrug‘i bilan” to‘xtatib qo‘yishda aybladi. Shu bilan birga, diplomat ta’kidlashicha, bir necha raund davom etgan muzokaralar “o‘zaro maqbul kelishuvlar”ga erishish mumkinligini ko‘rsatgandi.
Noyabr o‘rtalarida Zelenskiy G20 sammitida videomurojaat bilan chiqib, o‘zining o‘nta shartdan iborat bo‘lgan “tinchlik formulasi”ni taklif etgan edi. Ushbu shartlar radiatsiyaviy va yadroviy xavfsizlik; oziq-ovqat xavfsizligi; energetika xavfsizligi; barcha asirlar va deportatsiya qilinganlarning ozod etilishi; BMT ustavining bajarilishi hamda Ukraina hududiy yaxlitligi va dunyo tartibining qayta tiklanishi; Rossiya qo‘shinlarining olib ketilishi va jangovar harakatlarning to‘xtatilishi; adolatning qaytarilishi; ekotsid (flora va faunaning yo‘q qilinishi)ga qarshi kurash; eskalatsiyaga yo‘l qo‘ymaslik; nizo yakunlanganining mustahkamlanishini o‘z ichiga oladi.
Keyinroq Zelenskiyning jamoasi tinchlikka erishish bo‘yicha reja tafsilotlarini ishlab chiqayotgani ma’lum bo‘ldi. Takliflarni taxminan Ukrainada urush boshlanganiga bir yil to‘ladigan sanada, 24-fevral kuni taqdim etish ko‘zda tutilmoqda.
Izoh (0)