Xitoy rasmiy shaxslari o‘zaro suhbatlarida Rossiya prezidenti Vladimir Putinni “telba” deb atamoqda, Pekin esa Rossiya Ukraina bilan urushda g‘alaba qozonishiga ishonmayapti. Bu haqda Sky News xabar berdi.
Xitoylik amaldorlar fikricha, XXR hukumati Rossiyadan uzoqlashishi kerak.
Ularning so‘zlariga ko‘ra, Ukrainaga bostirib kirish qarori Rossiya rahbariyatining juda tor doirasi tomonidan qabul qilingan va Rossiyani mag‘lubiyat kutmoqda, u esa izolyatsiyaning kuchayishiga va Rossiya iqtisodiyotining yanada zaiflashuviga olib keladi.
Shuningdek, Pekin Putin Ukrainaga nisbatan rejalashtirilayotgan hujum haqida Xitoy rahbariyatini ogohlantirmaganidan ham norozi bo‘lgan.
Avvalroq Putin hujum haqida buyruq berguniga qadar Rossiya hukumati Xitoyni Ukrainaga katta ko‘lamli hujum boshlamoqchi ekani haqida ogohlantirmagani haqida Financial Times gazetasi besh nafar xitoylik yuqori mansabli amaldorlarga tayanib xabar bergan edi.
Putin fevral oyida Pekinga tashrifi chog‘ida Xitoy raisi Si Szinpinni Ukrainada harbiy operatsiya boshlashi haqida ogohlantirmaganini avvalroq o‘zi ham aytib o‘tgandi.
Putin va Szinpinning nazarda tutilayotgan uchrashuvi 4-fevral kuni Pekinda bo‘lib o‘tgan. O‘shanda e’lon qilingan qo‘shma bayonotda Xitoy Rossiyaning NATO sharqqa kengaymasligi haqidagi talabini va Yevropada xavfsizlik kafolatlari bo‘yicha boshqa takliflarni qo‘llab-quvvatlagandi.
Rossiya Ukrainada harbiy operatsiya boshlaganidan buyon Xitoy betaraf pozitsiyani egallab, Ukraina hududiy yaxlitligini yoqlab kelayotgandi, ammo sanksiyalar kiritmagan. Rossiyada qisman safarbarlik e’lon qilingach, Pekin harbiy harakatlarga nuqta qo‘yish va tomonlarning xavfsizlik sohasidagi xavotirlarini bartaraf qilish uchun ularni muzokaralarga chaqirdi.
Keyinroq Xitoy Tashqi ishlar vazirligi tomonlar dastlabki shartlarsiz muzokaralarni qayta boshlashi kerakligini aytdi.
Mavzuga doir:
Izoh (0)