Rossiyaning “Vagner” xususiy harbiy kompaniyasining faoliyati AQSH rasmiylarini xavotirga solmoqda, shu sababli Vashington uni zararsizlantirishga harakat qilmoqda. Bu haqda Davlat departamenti maslahatchisi Derek Sholle Serbiyaga tashrifi chog‘ida ma’lum qildi, deb xabar beradi ABC.
Uning ta’kidlashicha, “Vagner” Serbiya va boshqa mamlakatlarda jangchilarni yollashga intilmoqda, AQSH rasmiylari esa bunga yo‘l qo‘ymaslik kerak, deb hisoblaydi.
“Serbiyada ‘Vagner’ guruhidan xavotirlar bor yoki yo‘qligini bilmayman, biz o‘z tashvishlarimiz haqida gapirdik va hukumat bilan Belgradda hamda guruh faol bo‘lgan boshqa joylarda uning faoliyatini tugatish bo‘yicha hamkorlik qilishni intiqlik bilan kutyapmiz”, — deya qo‘shimcha qildi Sholle.
Serbiya qonunchiligi fuqarolarning boshqa mamlakatlardagi jangovar harakatlarda ishtirok etishini taqiqlaydi, jazo nafaqat janglarda qatnashganlar uchun, balki bunday faoliyatni “yollagan yoki rag‘batlantirganlar” uchun ham nazarda tutilgan, deb ta’kidlaydi Serbiyaning Danas gazetasi.
Avvalroq Politico nashri diplomatik yozishmalardan olingan ma’lumotlarga tayanib, “AQSH rasmiylari ‘Vagner’ning Ukrainadan tashqaridagi, jumladan Serbiya va Markaziy Afrika Respublikasidagi harakati va faoliyatini tobora ko‘proq kuzatmoqda”, deb yozgandi.
“Vagner” guruhi 2017-yildan beri AQSH sanksiyalari ostida.
Izoh (0)