Turkiya prezidenti Rajab Toyyib Erdo‘g‘onning fikricha, G‘arb Rossiya—Ukraina mojarosini hal qilish uchun harakat qilmagan, aksincha, “faqat provokatsiyalar” bilan shug‘ullangan. Uning iddao qilishicha, ziddiyat tomonlari o‘rtasida vositachilik rolini Turkiya zimmasiga olgan.
“Afsuski, G‘arb faqat provokatsiyalar bilan shug‘ullandi va Ukraina—Rossiya urushida vositachi bo‘lishga harakat qillmadi” — dedi Erdo‘g‘on Turkiya shimoli-sharqidagi Erzurum viloyatida yoshlar bilan uchrashuvda. U Anqara vositachi rolini o‘z zimmasiga olgani va uning sa’y harakatlari bilan “Qora dengiz don yo‘lagi foydalanishga topshirilganiga” e’tibor qaratdi.
Erdo‘g‘on ta’kidlashicha, Yevropa Ukrainadan eksport qilinadigan donning 44 foizini olgan. 16 foizi Turkiyaga, 14 foizi Afrika davlatlariga yuborilgan. Uning aytishicha, Turkiya Afrikadagi muhtoj davlatlarga jo‘natish uchun rus donidan un ishlab chiqarishni rejalashtirmoqda. Turkiya prezidenti, shuningdek, Rossiya bilan birgalikda o‘g‘itlarni eksport qilish bo‘yicha choralar ko‘rishga va’da berdi va bu masala “ishning eng og‘ir qismi” bo‘lishini aytdi.
Urush boshida Rossiya va Ukraina o‘rtasida tinchlik muzokaralari Turkiya vositachiligida o‘tgan, biroq may oyida ular to‘xtatilgandi. Yozda Turkiya va BMT vositachiligida tomonlar Odessa portlaridan Ukraina g‘allasini eksport qilish, shuningdek, Rossiyaning oziq-ovqat va o‘g‘itlarini chetga chiqarish yo‘lidagi to‘siqlarni bartaraf etishni o‘z ichiga olgan don bitimini tuzishga muvaffaq bo‘ldi.
G‘arb davlatlari so‘nggi paytlarda Ukrainaning “adolatli dunyo”ga intilish haqidagi bayonotlarini qo‘llab-quvvatlamoqda. Vladimir Zelenskiy Rossiya qo‘shinlarining Ukraina hududidan 1991-yilgi chegaralar doirasida, jumladan Qrimdan olib chiqib ketilishini talab qilmoqda. Moskva hisoblashicha, Kiyevning yondashuvi uning tinch yo‘l bilan kelishuvga tayyor emasligini ko‘rsatadi.
Izoh (0)