2022-yil noyabridan Turkiya Ukrainaga kassetali artilleriya o‘q-dorilari — qo‘sh vazifali takomillashtirilgan o‘q-dorilar (DPICM)ni yetkazishni boshlagan, deb xabar bermoqda Foreign Policy o‘z manbalariga tayanib. Ushbu o‘q-dorilar sovuq urush davrida qo‘shma ishlab chiqarish haqidagi bitim doirasida AQSHda ishlab chiqilgan va Turkiyada yasalgan.
Nashr ma’lumotlariga ko‘ra, Ukraina hukumati Vashingtondan ushbu o‘q-dorilarni yuborishni so‘ragan. AQSH ichki qonunchiligiga muvofiq DPICM’ni eksport qilish taqiqlangani sababli Ukrainaga rad javobi berilgan, chunki ushbu o‘q-sorilarda nuqson bo‘lish ehtimoli katta. Foreign Policy manbalaridan biri aniqlik kiritishicha, Turkiya Ukraina DPICM’ni olishi mumkin bo‘lgan yagona mamlakat bo‘lgan.
Avvalroq, 10-yanvar kuni Turkiya tashqi ishlar vaziri Mavlud Chavusho‘g‘li Anqara Ukraina prezidenti Vladimir Zelenskiyning tinchlik formulasini qo‘llab-quvvatlashini ma’lum qildi.
Noyabr o‘rtalarida Zelenskiy G20 sammitida videomurojaat bilan chiqib, o‘zining o‘nta shartdan iborat bo‘lgan “tinchlik formulasi”ni taklif etgan edi. Ushbu shartlar radiatsiyaviy va yadroviy xavfsizlik; oziq-ovqat xavfsizligi; energetika xavfsizligi; barcha asirlar va deportatsiya qilinganlarning ozod etilishi; BMT ustavining bajarilishi hamda Ukraina hududiy yaxlitligi va dunyo tartibining qayta tiklanishi; Rossiya qo‘shinlarining olib ketilishi va jangovar harakatlarning to‘xtatilishi; adolatning qaytarilishi; ekotsid (flora va faunaning yo‘q qilinishi)ga qarshi kurash; eskalatsiyaga yo‘l qo‘ymaslik; nizo yakunlanganining mustahkamlanishini o‘z ichiga oladi.
Ammo Rossiya hukumati Kiyev bilan Ukraina prezidenti Vladimir Zelenskiy tomonidan taklif qilingan “tinchlik formulasi” nizomlari asosida muloqot olib bormoqchi emas. Ukraina rahbariyatining tinchlik bo‘yicha rejasi konsepsiyasini Rossiya tashqi ishlar vaziri Sergey Lavrov xomxayol deb tavsifladi.
Kassetali o‘q-dorilar — parvoz chog‘ida mayda o‘q-dorilardan iborat kassetali qismi ajralib chiqadigan snaryadlar. Ular sochilib ketib, katta maydonga tushadi. Ularning alohida xavfi shundan iboratki, ular ba’zan portlamay qoladi va hududga mina sifatida joylashadi; ba’zan bu mayda bombalarni bolalar topib oladi. Kassetali o‘q-dorilardan foydalanishni taqiqlash haqidagi konvensiya 2010-yildan buyon amal qiladi. Uni 100 dan ortiq mamlakatlar imzolagan. Ular orasida Ukraina va Rossiya yo‘q.
Izoh (0)