Turkiya mudofaa vaziri Xulusi Akar Ukraina mudofaa vaziri Aleksey Reznikov bilan qo‘ng‘iroqlashdi. U zudlik bilan o‘t ochishni to‘xtatish va tinchlikni qayta tiklashga chaqirdi.
“Uchrashuv chog‘ida vazir Akar mintaqada tinchlik va barqarorlikni qayta tiklash hamda yanada ko‘proq qurbonlar yuzaga kelishining oldini olish uchun zudlik bilan o‘t ochishni to‘xtatish muhimligini qayd etdi”, — deyiladi Turkiya Mudofaa vazirligi saytida.
Vazir Turkiya Rossiya-Ukraina nizosini tinch yo‘l bilan tartibga solishda yordamlashishni va “barcha darajalarda” gumanitar ko‘mak ko‘rsatishda davom etishini va’da qildi.
Shuningdek, Xulusi Akar ma’lum qilishicha, don bitimi doirasida Ukraina portlaridan boshqa mamlakatlarga 17 million tonna don olib ketilgan. Uning so‘zlariga ko‘ra, Ukraina portlaridan donni olib chiqish uzluksiz davom etmoqda.
Avvalroq, 10-yanvar kuni Turkiya tashqi ishlar vaziri Mavlud Chavusho‘g‘li Anqara Ukraina prezidenti Vladimir Zelenskiyning tinchlik formulasini qo‘llab-quvvatlashini ma’lum qilgan edi.
Noyabr o‘rtalarida Zelenskiy G20 sammitida videomurojaat bilan chiqib, o‘zining o‘nta shartdan iborat bo‘lgan “tinchlik formulasi”ni taklif etgan edi. Ushbu shartlar radiatsiyaviy va yadroviy xavfsizlik; oziq-ovqat xavfsizligi; energetika xavfsizligi; barcha asirlar va deportatsiya qilinganlarning ozod etilishi; BMT ustavining bajarilishi hamda Ukraina hududiy yaxlitligi va dunyo tartibining qayta tiklanishi; Rossiya qo‘shinlarining olib ketilishi va jangovar harakatlarning to‘xtatilishi; adolatning qaytarilishi; ekotsid (flora va faunaning yo‘q qilinishi)ga qarshi kurash; eskalatsiyaga yo‘l qo‘ymaslik; nizo yakunlanganining mustahkamlanishini o‘z ichiga oladi.
Ammo Rossiya hukumati Kiyev bilan Ukraina prezidenti Vladimir Zelenskiy tomonidan taklif qilingan “tinchlik formulasi” nizomlari asosida muloqot olib bormoqchi emas. Ukraina rahbariyatining tinchlik bo‘yicha rejasi konsepsiyasini Rossiya tashqi ishlar vaziri Sergey Lavrov xomxayol deb tavsifladi.
Mavzuga doir:
Izoh (0)