Rossiya harbiylari 12-yanvar kuni kechqurun Soledarni to‘liq nazorat ostiga oldi. Bu haqda Rossiya Mudofaa vazirligi xabar berdi.
Shahar ustidan nazorat Artemovsk (Baxmut)da Ukraina qo‘shinlari ta’minotini uzib qo‘yish imkonini beradi, deyiladi vazirlik xabarida. Qo‘shimcha qilinishicha, so‘nggi uch kecha-kunduzda Soledar hududida 700 dan ortiq ukrainalik harbiylar va 300 donadan ziyod qurol-yarog‘ yo‘q qilingan.
“Soledar Rossiya qo‘shinlarining hujumchi va armiya aviatsiyasi, raketa qo‘shinlari va artilleriya guruhlari tomonidan dushmanga doimiy zarbalar berilishi sharofati bilan qo‘lga kiritildi. Ular shaharda Ukraina qurolli kuchlari pozitsiyalariga uzluksiz zarbalar berdi va zaxiralarning ko‘chirib o‘tkazilishi, o‘q-dorilar bilan ta’minlash, dushmanning boshqa mudofaa chiziqlariga o‘tishga urinishlariga yo‘l qo‘ymadi”, — deyiladi vazirlik xabarida.
“Vagner” xususiy harbiy kompaniyasi asoschisi Yevgeniy Prigojin 11-yanvarga o‘tar kechasi uning bo‘linmalari Donetsk viloyatidagi Soledar shahrini nazorat ostiga olgani haqida bayonot bergan edi. Biznesmenning matbuot xizmati u harbiylar qurshovida, go‘yoki, o‘sha shaharda qaziladigan tuz konlarida turgani aks etgan suratlarni e’lon qilgandi.
Keyinroq Ukraina qurolli kuchlari Sharqiy guruhi vakili Sergey Cherevatiy Prigojinning da’volarini yolg‘on deb atadi va jurnalistlarga Bosh shtab e’lon qiladigan tafsilotlarni kutishni tavsiya qildi.
Soledar — Donetsk viloyatidagi kichik shahar bo‘lib, so‘nggi vaqtlarda u uchun shafqatsiz janglar bormoqda. Uning qo‘ldan boy berilishi Ukraina qo‘shinlari uchun ancha kattaroq bo‘lgan Baxmut shahri mudofaasini qiyinlashtirishi mumkin, unga esa bir necha oylardan buyon rossiyaliklar tomonidan hujum olib borilmoqda.
Izoh (0)