FQB Xitoyning AQSHdagi xitoyliklar ortidan josuslik qilishga mo‘ljallangan “politsiya bo‘limlari”ni topdi

2022-yilning kuzida AQSH Federal qidiruv byurosi (FQB) xodimlari Bruklindagi Chayna-tounda reyd o‘tkazib, Xitoyning xorijdagi noqonuniy “politsiya bo‘limlari”ni topgan, deb yozadi The New York Times tergovdan xabardor manbalarga tayanib.

Xitoyning AQSHdagi elchixonasi esa u yerda xitoyliklarga vatanida olgan haydovchilik guvohnomasini yangilash kabi xizmatlarni ko‘rsatuvchi ko‘ngillilar borligini da’vo qilmoqda.

The New York Times tomonidan o‘rganib chiqilgan Xitoy davlat OAVlari xabarlarida bunday tashkilotlar Xitoy rasmiylari tomonidan “chet elda xizmat ko‘rsatish markazlari” sifatida tasvirlangan, ba’zi xabarlarda ular hatto mahalliy hukumatlar bilan hamkorlik qilmasdan “razvedka ma’lumotlarini to‘plashi” va xorijda jinoyatlarni ochishi aytilgan. G‘arb rasmiylari va huquq himoyachilari ushbu materiallarga e’tibor qaratganidan so‘ng, ularning ba’zilari OAVdan o‘chirib tashlandi, deya ta’kidlaydi NYT.

G‘arb rasmiylarining fikricha, xorijdagi xizmat ko‘rsatish markazlari deb atalayotgan bu bo‘limlardan aslida xorijdagi Xitoy fuqarolari, jumladan dissidentlar ustidan josuslik qilish uchun foydalanilmoqda. Jumladan, The New York Times gazetasi Xitoy hukumatining xitoyliklarni vatanga qaytishga majburlashdan iborat “Tulki ovi” dasturini tilga oldi. Davlat matbuoti xabarlari va Xitoy rasmiylarining ommaviy bayonotlariga ko‘ra, kamida to‘rtta shahar okruglari — Fuchjou, Sintiyan, Nantun va Venchjou boshchiligida Yaponiya, Italiya, Fransiya, Buyuk Britaniya, Germaniya, Vengriya, Chexiya Respublikasi kabi mamlakatlarda o‘nlab “politsiya bo‘limlari” tashkil etilgan.

The New York Times gazetasining yozishicha, Nyu-Yorkda bunday bo‘lim Fuchjou tomonidan tashkil etilgan va America Changle Association NY jamoat tashkilotining Xitoy ofislarida joylashgan. Bu haqda China Youth Daily davlat gazetasi xabar bergandi. Keyinchalik material o‘chirib tashlandi. Xitoy politsiya bo‘limlarining boshqa manzillari xususiy korxonalar, jumladan, xitoycha restoranlar manzillariga mos keladi. XXR elchixonasining ta’kidlashicha, ushbu obyektlar “xizmat ko‘rsatishni taklif etgan xorijdagi xitoyliklar tomonidan ochilgan”.