Rejissor Deniel Roer tomonidan suratga olingan “Navalniy” hujjatli filmi Cinema Eye Honors xalqaro kinofestivalida ikkita mukofotga sazovor bo‘ldi. Bu haqda festival saytida xabar berilgan.
Kartina “Kino yaratishdagi eng yaxshi yutuq” va “Tomoshabinlar tanlovi” mukofotlariga sazovor bo‘ldi.
Festivalning bosh sovrini rejissor Shaunak Sen tomonidan suratga olingan “Nafas oladigan hamma” filmiga nasib etdi — kartina yaralangan qushlarni parvarishlagan ikki aka-uka haqida hikoya qiladi. Film avvalroq Kann kinofestivalida eng yaxshi hujjatli film uchun “Oltin ko‘z” mukofotini qo‘lga kiritgandi.
“Navalniy” filmining premyerasi 2022-yil yanvar oyida “Sandens” kinofestivalida bo‘lib o‘tgan va unda tomoshabinlar e’tirofi mukofotiga sazovor bo‘lgandi. Film 2020-yilda siyosatchining “Novichok” moddasi bilan zaharlanishi, Germaniyada davolanishi va Rossiyaga qaytishi haqida hikoya qiladi.
Avval “Navalniy” hujjatli filmlar nominatsiyasida Britaniyaning BAFTA mukofoti hamda “Oskar” uchun nomzodlar ro‘yxatiga kiritilgan edi. 2023-yilgi BAFTA taqdirlash marosimi 19-fevralda, “Oskar” esa 12-martda bo‘lib o‘tadi.
Izoh (0)